झिगू लाख स्वयां अप्वः दां ज्वने मदु

येँ  – सरकारं झिगू लाख स्वयां अप्वः दां ज्वना जुइत प्रतिबन्ध तयेवं हुण्डी कारोबार म्हो जूगु दु । झिगू लाख स्वयां अप्वः दां ज्वना वःगु खन धाःसा स्रोत मालेगु ज्या यायेवं हुण्डी कारोबारय् मन्दी वःगु खः । झिगू लाख स्वयां अप्वः ध्यबा बैंक मार्फत कारोबार यायेमाःगु नियम हःगु दु । न्हापा करोडौं तका ध्यबा हुण्डी मार्फत कारोबार यायेगु यानाच्वंगु खःसा आः धाःसा थुकथं ध्यबा ज्वना जुइत थाकुइवं हुण्डी कारोबार हे म्हो जूगु खः ।

हुण्डी कारोबार म्हो जुइवं रेमिटेन्स दुहां वयेगु धाःसा अप्वया वनाच्वंगु खँ राष्ट्र बैंकं धाःगु दु । झिगू लाख स्वयां अप्वः ध्यबा ज्वना जुइत स्रोत क्यनेमाःगु व्यवस्था कडा जुइवं हुण्डी व्यवसायीत तःधंगु कारोबार यायेगु ज्या बन्द याःगु दु । आः नं चीधंगु कारोबार धाःसा जुयाच्वंगु खँ सीदुगु दु ।मेखे सरकारं रेमिटेन्सपाखें दुहां वःगु ध्यबा नं आः बैंक खाता मार्फत भुक्तानी यायेमाःगु व्यवस्था याःगु दु ।

सरकारं खुइद्वः स्वयां अप्वः ध्यबा बैंक खाता मार्फत भुक्तानी यायेमाःगु व्यवस्था याःगु दु । थुकिं यानाः वैदेशिक रोजगारीइ वनाच्वंपिंसं छ्वया हइगु ध्यबा कायेत धाःसा समस्या जुयाच्वंगु दु ।

गांगामय् आपालं सर्वसाधारण जनताया बैंक खाता मदुगुलिं समस्या जुयाच्वंगु खँ धाःगु दु । मेखे राष्ट्र बैंकं धाःसा आपालं नेपाःमियाके बैकिङ कारोबार यायेगु बानी मदुगुलिं समस्या जूगु खँ धासें खुइद्वः स्वयां अप्वः दुहां वइगु रेमिटेन्सया कारणं जनता आः बैंकिङ कारोबार यायेगु ज्याय् अभ्यस्त जुइगु खँ धाःगु दु । प्रत्येक जनतायात बैंकिङ कारोबारय् हयेगु योजना रेमिटेन्सया कारणं सफल जुइगु खँ राष्ट्र बैंकं धाःगु दु । रेमिटेन्सपाखें गुलि ध्यबा दुहां वल धकाः सीकेत नं बैकिङ कारोबारं ग्वाहालि याइ ।

सम्बन्धित बुखँ

LEAVE YOUR COMMENTS