‘एस’ दुने आन्तरिक कचवं, पार्टी त्वःतीपिं अप्वल
येँ (नेपालभाषा टाइम्स)÷एमाले–पाखें विभाजन जुयाः माधव नेपालया नेतृत्वय् न्ह्यानाच्वंगु नेकपा (एकीकृत समाजवादी) पार्टी न्हापांगु अधिवेशन लिपा हे आन्तरिक विवादय् तक्यं वंगु दु । थुकिं यानाः पार्टी दुने सन्तुलनया समस्या पिहां वःगु दुसा मेखे असन्तुष्ट कार्यकर्तात धमाधम पार्टी त्वःताः एमालेय् हे लिहां वनेगु क्रम अप्वया वःगु दु ।
महाधिवेशन क्वचाःसां नं ताः ई तक पद विभाजन याये मफयाच्वंगु उगु पार्टीइ म्हीग मतदानपाखें पद विभाजनया ज्या जूगु खःसा थुकिं यानाः पार्टी दुने गुटबन्दीया अवस्था पिकया बिउगु खँ धाःगु दु ।
मतदानय् आपालं आवश्यकपिं नेतातय्त अध्यक्ष माधव नेपालं हे गुटगत निर्णय यानाः बुका बिउगु द्वपं लाःगु दु । मिसा उपाध्यक्ष पदय् पराजित जूम्ह चर्चित नेता रामकुमारी झाँक्रीयात समेत अध्यक्ष नेपालं बुकूगु खँय् चर्चाय् वःगु दुसा उपमहासचिव पदय् बूम्ह पुलांम्ह मन्त्री जीवनराम श्रेष्ठं थःत अध्यक्षं हे गुटया राजनीति यानाः बुकूगु धकाः सार्वजनिक अभिव्यक्ति बियादीगु दु । छगू अनलाइन माध्यमयात अन्तर्वार्ता बिसें नेता श्रेष्ठं मतदानय् छुं नं कथंया गुटगत ज्या मयायेगु धकाः नियम दयेकूगु खःसां नं अध्यक्ष माधव नेपालं थ्वयात बुकि, थ्वयात त्याकि धकाः क्याम्पेन यानाः थःत बुकूगु द्वपं बियादीगु दु । अध्यक्षया सतीपिं मनूतय्सं आचारसंहिता विपरित उम्मेदवारतय्गु लिष्ट हे इना बिउगु खँ नं कनादीगु दु ।
चुनावय् पराजित जुइवं श्रेष्ठं पार्टीया कार्यालय सचिवया पदं नं राजीनामा बियादीगु दु । चुनावय् बूगु कारणं आः पदय् च्वंच्वनेगु नैतिक रुपं मिले मजू धासें वय्कलं राजीनामा बियादीगु खः ।
थ्वहे झ्वलय् छखे पार्टी दुने पद विभाजनया लागिं मतदान जुयाच्वंगु हे इलय् मेखे स्वनिगःया थीथी लागाय् च्वंपिं सक्रिय कार्यकर्तात नेकपा एस त्वःताः एमालेय् लिहां वंगु दु । पार्टी त्वःतूपिं जिल्ला कमिटीया उपाध्यक्ष बटुकृष्ण थापा व सचिव धुर्वराज न्यौपाने लगायतया छथ्वः कार्यकर्तायात म्हिगः एमालेया बागमती प्रदेश इन्चार्ज राजन भट्टराई लगायतं पार्टी प्रवेश याकादीगु खः ।
बटुकृष्ण थापा वंगु स्थानीय चुनावय् किपू नगरपालिकाया मेयर पदय् दंम्ह उम्मेदवार नं खः । किपुली आः मंसिर महिनाय् मेयर पदया उपचुनाव नं जुइत्यंगु दु । म्हिगः किपू लिसें तारकेश्वर नगरपालिकाया नं आपालं कार्यकर्तात एमालेय् लिहां वंगु खः ।
नेकपा एस त्वःता एमालेय् दुहां वंपिंत बुधवाः एमाले येँ जिल्लापाखें लसकुस यानाच्वंगु ।
LEAVE YOUR COMMENTS