लाखे आजु आसनय् बिज्याकल

येँ(नेपालभाषा टाइम्स)- म्हिगःनिसें मजिपाः लाखेया ख्वाःपाः सन्दुलिं पिकयाः आसनय् विराजमान याकेगु ज्या जुल । यँयाः न्ह्यःने थ्यंकः वःगुलिं उकिया हे तयारी कथं लाखे आजुया ख्वाःपाः आसनय् बिज्याकूगु खः । आः ख्वाःपाःयात पुंयाथाय् छ्वयाः लंपुं छायेगु ज्या जुइसा वयां च्यान्हु लिपा ख्वाःपातय् सँ नं स्वानाः न्यास पुजा याइ । न्यास पुजा लिपा लाखे आजु जीवित जूगु भाःपी ।

मेथाय् फुक्क थासं गुंलां लाखे पिहां वइगु खःसा मजिपाः छथाय् तक यंलां लाखे पिहां वइ । उकिं थ्व लाखेयात यंला लाखे नं धायेगु याइ ।
लाखेया थ्व ख्वाःपाः मजिपाःया लाखेननिइ च्वंगु लाखेछेँय् तयातःगु खः । अन च्वंगु सिँयागु सन्दुलिइ थ्व ख्वाःपाः तयातइगु खःसा ख्वाःपाः लिकाइबलय् सन्दुलिइ स्व हे मस्वसे ल्हाः छपा दुछ्वयाः ख्वाःपाः पिकाइगु खः ।

लाखे आजु आसनय् तयातइगु इलय् सुयां पुजा याये माःगु दुसा पुजा याये फइगु खँ धाःगु दु । हनुमानध्वाखाय् यःसिं थनीकुन्हु मजिपातय् लाखे पिहां वइ । वकुन्हु यँयाः जात्राय् पिहां वइगु थीथी प्याखंत लाखे लिसें पुलुकिसि, दीप्याखं, महाकाली प्याखं, सवःभकु प्याखं आदि नं पिहां वइ ।