मनाङ व थ्रीस्टार बराबरीइ

येँ (नेपालभाषा टाइम्स)÷ परम्परागत प्रतिद्वन्द्वी मनाङ मस्र्याङदी व थ्रीस्टार दथुया कासा बराबरीइ क्वचाःगु दु । सहीद स्मारक ए डिभिजन लिग अन्तर्गत म्हिगः जूगु कासाय् निगूलिं टिमं निगू निगू गोल थ्वायेवं कासा बराबरीइ क्वचाःगु खः । कासाया १९ औं मिनेटय् भारतीय कासा लालरम्मावियां फ्रिकिक पाखें गोल यासें थ्रीस्टारयात अग्रता बिउगु खः । लालरम्मावियाया लिगय् थ्व डेब्यु कासा खः ।
न्हापांगु हाफय् छगू जक गोल जुइवं थ्रीस्टारं अग्रता कयाच्वंगु खःसा निगूगु हाफय् स्वंगू गोल जुल । लिपांगु हाफ सुरु जूगु ४ मिनेट लिपा हे मनाङयात पेनाल्टिया ह्वःताः चूलात । अशोक खवासं पेनाल्टि बक्स दुने अन्जन विष्टयात क्वःदयेकेवं वःगु पेनाल्टिइ अञ्जनं हे गोल यासें कासा १–१ गोलया बराबरीइ हःगु खः । कासाया ६७ औं मिनेट अञ्जनं हे मेगु थप छगू गोल यासें मनाङ २–१ गोलं अग्रता बिउगु खः । कमल श्रेष्ठं थ्वाःगु फ्रिकिकय् अन्जनं हेड यासें गोल याःगु खः । कासाया ८४ औं मिनेटय् लालरम्मावियां हे मेगु गोल याना बिइवं थ्रीस्टार बराबरी यायेत ताःलाःगु खः ।
म्हिगःया कासा लिपा मनाङ न्हय्गू कासाय् १३ अंक कयाः शीर्षस्थानय् थ्यंगु दुसा थ्रीस्टार ११ अंक सहित प्यंगूगु थासय् दु ।
म्हिगः हे जूगु मेगु कासाय् पुलिस क्लबं जावलाखेल युथ क्लबयात २–० गोलं बुकल । पुलिसया निंतिं सौजन राई व कप्तान सुमन सुवेदीं छगू छगू गोल याःगु खः ।

सम्बन्धित बुखँ

LEAVE YOUR COMMENTS