ने. सं. ११४४ कछलागा तृतीया -

महानगरया अनुदानं शिक्षण अस्पतालय् सिटी स्क्यान जडान

येँ -येँ महानगर पालिकां त्रिभुवन विश्वविद्यालय शिक्षण अस्पताल महाराजगंजयात लःल्हाःगु सिटी स्क्यान मेशिन औपचारिक रुपं संचालनय् हःगु दु । अस्पतालय् जूगु छगू ज्याझ्वःया दथुइ नेकपा एमालेया उपाध्यक्ष लिसें पुलांम्ह उपप्रधानमन्त्री ईश्वर पोखरेल, येँ महानगर प्रमुख विद्यासुन्दर शाक्यं मंकाःकथं उगु सिटी स्क्यान मेशिनया उलेज्या यासें औपचारिक रुपं संचालनय् हःगु खः ।

उगु इलय् महानगर प्रमुख शाक्यं मेशिन खरिद वापत खुगू करोड १८ गू लख १६,५५७ तका दांया चेक अस्पतालया निमित्त कार्यकारी निर्देशक प्रा. डा. सुभाषप्रसाद आचार्ययात लःल्हानादीगु खः ।

महानगर प्रमुख शाक्यं झिंप्यला न्ह्यः २०७७ मंसिर २० गते जूगु सम्झौता कार्यान्वयनय् हयेगु खंगु खँय् लसता प्वंकादिल । सम्झौता लिपा औपचारिक प्रक्रिया पूवंकेत ई काःगु खःसां थौं वयाः उकियात कार्यान्वयन याये खंगु धासें प्रमुख शाक्यं लसता प्वंकादीगु खः ।

विश्वव्यापी कोरोनाया महामारी न्यना वनाच्वंगु तत्कालीन इलय् आर्थिक क्षति जूसां मानवीय क्षति मजुइकेगु नीति येँ महानगरं काःगु धासें देय्या संघीय राजधानी जुयाच्वंगु येँय् महानगरवासी जक मखु, मुक्कं देशवासीया निंतिं नं सेवा बीगु उद्देश्यं स्वास्थ्य क्षेत्रय् लगानी याना वयाच्वनागु वय्कलं कनादिल ।

‘गुगु इलय् कोरोना संक्रमण शुरु जुल, उगु इलय् स्वनिगःया अस्पतालय् संक्रमितया निंतिं अति आवश्यक भेन्टिलेटर तसकं म्हो जक दुगु व थःपिंसं मानवीय क्षति वनेत सामुदायिक, सरकारी, सेना व प्रहरीया विभागीय अस्पतालनापं यानाः आतकया दुने ४५ गः स्वयां अप्वः भेन्टिलेटर व मेमेगु आवश्यक सामग्री उवलब्ध याकेधुंगु दु’ प्रमुख शाक्यं धयादिल ।

कोरोना महामारीया इलय् महानगरया दक्वं विभागयात विदा दुसां स्वास्थ्य व सरसफाइया कर्मचारीतय्त विदा मबिसे निरन्तर रुपं सेवा प्रवाह याना वयाच्वनागु नं वय्कलं कनादिल ।

मूपाहां एमालेया वरिष्ठ उपाध्यक्ष पोखरेलं आवश्यकताया ल्याखं चिधं, तर महत्वया ल्याखं तःधंगु ग्वाहालि येँ महानगरं याःगु दु धासें महानगरया ज्यायात कयाः च्वछायादिल । वय्कलं महानगरं स्वास्थ्य ख्यलय् याःगु लगानीया सकारात्मक लिच्वः नं पिहां वयाच्वंगु दु धासें अस्पतालय् वइपिं ल्वगितय्सं तत्काल सेवा काये खनीगु विश्वास प्वंकादिल ।

उपप्रमुख हरिप्रभा खड्गी श्रेष्ठं सिटी स्क्यान मेशिन जडान लिपा आपालं ल्वगिं सेवा काये खनीगु खँय् थः विश्वस्त दु धासें महानगरवासी जक मखु समग्र देशवासीयात न सेवा बीगु विश्वास प्वंकादिल ।

त्रिवि चिकित्साशास्त्र अध्ययन संस्थान (आईओएम)या डीन प्रा. डा. दिव्यासिंह शाहं आधुनिक चिकित्सा विज्ञानय् सिटी स्क्यान छगू अतिकं आवश्यक जुइधुकूगु दु धासें दुर्घटना वा मस्तिष्कघात जूपिनिगु निंतिं थ्व मेशिन मदयेक उपचार सम्भव मदुगु खँ कनादिल ।
मेशिनया औपचारिक उलेज्या जुइ न्ह्यः हे संचालन यानाः बाःछिया दुने द्वःछि स्वयां अप्वःसित सेवा बी धुंकूगु दु ।