
येँ (नेपालभाषा टाइम्स)÷भारत भ्रमणय् वनाच्वंम्ह परराष्ट्र मन्त्री आरजु देउवा राणा व भारतीय विदेश मन्त्री एस. जयशंकर दथुइ म्हिगः न्हूदिल्लीइ सहलह जूगु दु । बैठक लिपा परराष्ट्र मन्त्री देउवां जयशंकरयात नापलायेगु ज्या फलदायी जूगु खँ धयादीगु दु । थ्व झ्वलय् निगू पक्षीय हित, नेपाः–भारत सम्बन्धया थीथी पक्ष व आपसी ग्वाहालि कालबिल यायेगु बारे सहलह जूगु खँ धयादीगु दु ।
उकथं हे भारतीय विदेश मन्त्री जयशंकर नं नेपाःया विदेशमन्त्री राणायात न्हापांगु औपचारिक विदेश भ्रमणय् लसकुस याये खनाः थः लय्तायागु खँ कनादीगु दु । जयशंकरया हे औपचारिक ब्वनाय् परराष्ट्र मन्त्री राणा भारत भ्रमणय् झाःगु खः ।
भारतीय विदेश मन्त्री जयशंकर एक्सय् च्वयादीगु दु, ‘ऊर्जा, व्यापार, कनेक्टिभिटी व पूर्वाधार विकास लगायत बहुआयामिक ग्वाहालियात कयाः सहलह जूगु दु । नेपालं भारतय् १ हजार मेगावाट मत निर्यात याइगु जूगुलिं खुसी लगे जूगु दु ।’ थगुने भारतं नेपाःपाखें १० हजार मेगावाट मत आयात यायेगु सहमति याःगु खः ।
नापलायेगु ज्याझ्वलय् नेपाःपाखें परराष्ट्र मन्त्री राणा, भारतया नितिं नेपाली कार्यवाहक राजदूत सुरेन्द्र थापा, परराष्ट्र मन्त्रालयया दक्षिण एसिया महाशाखाया प्रमुख भृगु ढुंगानापिं दुगु खःसा भारतपाखें मन्त्री जयशंकर, विदेश मन्त्रालयया सचिव विक्रम मिस्री, नेपाःया नितिं भारतीय राजदूत नवीन श्रीवास्तव दुथ्याःगु खः ।
परराष्ट्रमन्त्री देउवां भारतया प्रधान– मन्त्री नरेन्द्र मोदीयात नं नापलाइगु खँ वःगु दु । वय्कः औपचारिक भ्रमण क्वचायेकाः थःगु स्वास्थ्य परीक्षण नं याकाः स्वदेश लिहां झाइगु ग्वसाः दु ।
भारतं नेपाःयाके अझ मत न्याइगु
भारतं नेपाःयापाखें थप २५१ मेगावाट मत न्याना काइगु जूगु दु । भारतया विद्युत मन्त्रालय अन्तर्गतया केन्द्रीय विद्युत प्राधिकरणं हरियानायात थप १२५.८९ मेगावाट व बिहारयात १२५.००४ मेगावाट मध्यकालीन सम्झौता कथं निर्यात यायेत नेपाल विद्युत प्राधिकरणयात स्वीकृति बिउगु खः । प्राधिकरणं झिगू जलविद्युत आयोजनां उत्पादन याइगु १२५.००४ मेगावाट मत बिहारयात मीगु जुइ । उकथं हे निगू जलविद्युत आयोजनां उत्पादन याःगु १२५.८९ मेगावाट विद्युत हरियाणा राज्ययात बी । नेपालं थःथाय् उत्पादन जूगु मत थःथाय् खपत जुयाः वर्षायामया ल्यं दइगु मत जुननिसें अक्टोबर तक बिहार व हरियानायात मीगु खः ।
LEAVE YOUR COMMENTS