स्वंगूगु लहर वयेत्यंगु खः ला ? जात्रा पर्व छु यायेगु ?

येँ – वंगु छवाः न्ह्यवंनिसें अप्वया वनाच्वंगु कोरोना संक्रमितया ल्याःयात स्वयाः डाक्टरतय्सं नेपालय् कोरोनाया स्वंगूगु लहर वयेत्यंगुया स्पष्ट संकेत प्राप्त जूगु खँ धाःगु दु । न्हियान्हिथं संक्रमितया ल्याः थपे जुजुं वंगुलिं टेकुया कोरोना अस्पतालया बेड जायेधुंकूगु दु । अन अस्पताल दुनेया बेड पूर्ण रुपं जाःगुलिं आः पिने च्वंगु टहराय् नापं बेड तयाः विरामीया वासः शुरु याना हःगु दु ।

उखे सशस्त्र प्रहरीया २०० बेड नं आः याकनं हे जायेत्यंगु खँ धाःगु दु । थौंकन्हय् ति हे कोरोना विरामीत अप्वः वल धाःसा बेड याकनं जाइगु खँ अस्पताल सूत्रं धाःगु दु ।
आः अप्वयाच्वंगु विरामीया चाप स्वयेबलय् येँय् उकुन्हु थें हे हानं हाहाकार जुइगु अवस्था थ्यंगु अनुमान नं डाक्टरतय्सं याःगु दु । लिसें थुकियात वय्कःपिंसं कोरोनाया स्वंगूगु लहर वयेत्यंगुया संकेत खः धाःगु दु ।

सरकारं लकडाउन छ्वासुकूसां नं स्वास्थ्य मापदण्ड कडा रुपं पालना मयाःगु कारणं यानाः संक्रमितया ल्याः अप्वःगु खँ धाःगु दु । थ्वहे झ्वलय् म्हिगः जक देय्न्यंकं प्यद्वः स्वयां अप्वः कोरोना संक्रमित जूगु दु । स्वास्थ्य तथा जनसंख्या मन्त्रालयया कथं म्हिगः पीसीआर विधिपाखें ११ हजार ३७४ म्हेसिया कोरोना परीक्षण जूगु खःसा उकी
२९७५ म्हेसित संक्रमत पुष्टि जूगु दु ।

उकथं हे एन्टिजेन विधिं ४९४४ म्हेसित परीक्षण यायेगु झ्वलय् २९७५ म्ह कोरोना संक्रमित जूगु दु । म्हिगः जक कोरोना भाइरसं १५३५ म्ह मुक्त जूगु दु । म्हिगः स्वनिगलय् जक १२७९ म्ह कोरोना संक्रमित जूगु दु । म्हिगः येँय् ९०८ म्ह, यलय् १६५ म्ह व ख्वपय् २०६ म्ह कोरोना संक्रमित जूगु खः ।

जात्रा पर्व छु यायेगु ?
स्वनिगलय् स्थानीय जात्रापर्व शुरु जुइत्यंगु इलय् लाक्क कोरोना महामारी तच्वइन धइगु त्वहःचिनाः सीडीओ कार्यालयतय्सं हुलमुल मयायेगु निर्देशन सहित विज्ञप्ति जारी यासें स्वनिगःया संस्कृतिह्यमि जनता चिन्तित जूगु दु । कन्हय् गथांमुगः चः¥हेनिसें स्वनिगलय् थीथी जात्रा पर्व शुरु जुइ । तर स्वनिगःया सीडीओतय्सं आः गनं नं भेला, सभा, सम्मेलन, ¥याली आदि याये मते धकाः निर्देशन जारी याःगु दु । खतुं उकी ‘जात्रा पर्व’ धइगु खँग्वः छ्यलातःगु मदु । गथांमुगः धुनेवं गुंपुन्हि वइ ।

येँ व ख्वपय् सापारु कुन्हु व यलय् मतयाः कुन्हु थः मदुपिं छेँजःया नामं सायाः छ्वयेमाःगु व मतयाः वनेमाःगु परम्परा दु । अथे वनेमाःपिं मनूतय् तयारी यायेगु लाकि मयायेगु धकाः अन्यौल सिर्जना जूगु दु । जात्रा पर्वयात कयाः स्थानीय जनतां चिउताः नं क्यनाहःगु दु ।