म्याग्दीया बेनीइ बर्षे प्याखंया रौनकता
येँ(नेपालभाषा टाइम्स)- म्याग्दीया सदरमुकाम बेनी बजारय् च्वंपिं स्थानीय नेवाःतय्सं बर्षे प्याखंयात थुगुसी नं निरन्तरता बिउगु दु । बजारय् बस्ती च्वंगु इलंनिसें क्यनेगु याना वयाच्वंगु वर्षे प्याखंयात स्थानीय नेवाःतय् सक्रियताय् क्यनाः प्याखं क्यनेगु याना वयाच्वंगु दु । थुगु प्याखं थनया विशेषता जूगुलिं रौनकता नं उतिकं खने दयाच्वंगु दु ।
नेपालभाषा मंकाः खलः बेनी अन्तर्गतया ल्याय्म्ह पुचःया नेतृत्वय् क्यनेगु याना वयाच्वंगु थुगु प्याखं गथांमुगः चः¥हेनिसें शुरु जुइगु व चथाः छन्हु न्ह्यः गुंलागा तृतियातक क्यनेगु याइ । ल्याय्म्ह पुचःया नायः जेनेश श्रेष्ठं थःपिनिं पुर्खा शुरु याःगु परम्परागत प्याखं स्थानीय ल्याय्म्ह व मस्तय्त आवश्यक तालिम व अभ्यास याकाः न्हू पुस्तायात हस्तान्तरण यायेगु याना वयाच्वनागु जानकारी बियादिल ।
बेनी बजारय् न्हियान्हिथं सनिलय् वर्षे नाच अन्तर्गत थीथी प्याखं क्यनेगु याना वयाच्वंगु दु । सतक, चोकय् क्यनेगु याना वयाच्वंगु थुगु प्याखं स्वयेगु निंतिं मस्त, ल्याय्म्ह ल्यासे, ज्याथःजिथिपिं तकं उतिकं मुनाः स्वयेगु यानाच्वंगुलिं प्याखंया रौनकता अप्वया वनाच्वंगु वय्कलं कनादिल । थुगुसी प्याखनय् लाखेप्याखं, सल प्याखं, जोगी प्याखं, नागनागिनीलिसें श्रीकृष्ण रथयात्रा लगायतया ज्याझ्वः नं दुथ्याकाःगु नायः श्रेष्ठं कनादिल । थ्व स्वयां न्ह्यः रोपाइँ, वामा प्याखं, द्वहं प्याखं नं दुथ्याकागु खःसां व्यवस्थापन व जनशक्तिया समस्या जूगुलिं सीमित प्याखंयात जक प्राथमिकता बियाः क्यनेगु याना वयाच्वंगु दु ।
बेनीया हे सांस्कृतिक म्हसीकाया रुपय् दयाच्वंगु प्याखनय् न्हू न्हूपिं कलाकारत नं आकर्षित जुया वयाच्वंगु व थुकिं यानाः प्याखंया संरक्षणलिसें निरन्तरता बीत तःधंगु ग्वाहालि जुयाच्वंगु लाखे प्याखंया संयोजक सन्दिप श्रेष्ठं कनादीगु दु । प्याखनय् स्थानीय नेवाः समुदाय जक मखसे बेनीइ च्वना वयाच्वंपिं मेमेगु जातजाति व समुदायया मस्त व न्हू पुस्ताया नं सहभागिता दया वयाच्वंगु वय्कलं कनादिल ।
झण्डै निसः दँ पुलांगु धयातःगु प्याखंयात निरन्तरता बीया निंतिं न्हूपिं कलाकारपिंत तालिम नं बिया वयाच्वंगु दु । परम्परानिसें न्ह्याना वयाच्वंगु सांस्कृतिक व मौलिक प्याखं संरक्षणया निंतिं ल्याय्म्हतय् उत्साहजनक सहभागिता दया वयाच्वंगु दु । गुकिं यानाः प्याखंयात निरन्तरता बीत ग्वाहालि जुया वयाच्वंगु कलाकार अभिनेष श्रेष्ठया धापू दु । आधुनिकताया प्रभाव व मेमेगु थीथी कारणं रैथाने संस्कृति लोप जुइगु अवस्थाय थ्यनाच्वंगु सन्दर्भय् पुर्खां त्वःता थकूगु प्याखंया ल्यंका तयेगु दायित्व ल्याय्म्हतय् ब्वहलय् वःगु वय्कःया धापू दु ।
LEAVE YOUR COMMENTS