अखिलपाखें लाल्टिन च्याकाः जुलुस

येँ (नेपालभाषा टाइम्स) – संसद विघटन यायेगु सरकारया निर्णय प्रतिगामी खः धासें नेकपाया दाहाल-नेपाल पक्षया अनेरास्ववियुं म्हिगः लाल्टिन जुलुस पिकाःगु दु । येँया फिब्व ख्यलय् मुनाः न्हिनय् हे लाल्टिन च्याकाः उगु जुलुस पिकाःगु खः । विद्यार्थीतय्सं ‘संसद विघटन माने याये मखु, संसद विघटनया धारा ग्व ? न्हिनय् लाल्टिन च्याका न्हिं ! असंवैधानिक पलाः खारेज या, बयलगाडा गन दु अनेरास्ववियु थन दु’ धइगु नारा थ्वयेकूगु खः ।

विद्यार्थीया जुलुस फिब्व ख्यलं न्हू बानेश्वरय् वनाः कोणसभाय् हिउगु खः । सभाय् न्ववायेगु झ्वलय् अनेरास्ववियुया सहसंयोजक रञ्जित तामाङं नेपाःया संविधानय् संसद विघटन यायेगु धारा मदु धासें असंवैधानिक पलाः भिंकेमाःगु माग यानादिल । लिसें ओली नेतृत्वया फुक्कं मन्त्रीतय्त ख्वालय् हाकः इकेगु ख्याच्वः नं बियादीगु दु ।