ने. सं. ११४४ कौलाथ्व पञ्चमी -

कान्तिपथय् च्वंगु पर्यटकीय बसपार्क चिइकीगु

येँ – थनया जमः, कान्तिपथ लागाय् च्वंगु पर्यटकीय बसपार्क आः उगु थासं चिला वनीगु जूगु दु । झण्डै स्वंगू दशक न्ह्यवंनिसें कान्तिपथस्थित निर्वाचन आयोगया न्ह्यःने पर्यटकीय बसपार्कया रुपय् संचालन जुया वयाच्वंगु बस आः उगु थासं चिइकेत्यंगु खः ।स्वनिगलं पिने न्हियान्हिथं थीथी गन्तव्यय् वनीपिं द्वलंद्वः स्वदेशी व विदेशी पर्यटकत उगु थासय् वनाः बस गयेगु याना वयाच्वंगु खः ।

आः उगु थासं पर्यटकीय बसपार्कयात चिइकाः सो¥हखुट्टेय् यंकीगु जूगु दु । गृह प्रशासन सुधार योजना अन्तर्गत गृहमन्त्रीया निर्देशनय् कान्तिपथस्थित पर्यटकीय बसपार्कयात चिइकाः सो¥हखुट्टेय् यंकेत्यंगु खः ।कान्तिपथस्थित पर्यटकीय बसपार्कयात चिइकाः मेगु थासय् यंकेगु निंतिं छगू समिति तकं गठन याःगु खः ।

येँ महानगरपालिकाया सहसचिव राजेश्वर ज्ञवालीया संयोजकत्वय् गठन यानातःगु समितिइ ट्राफिक प्रहरी, सरोकारवाला निकाय प वडाया प्रतिनिधिपिं नं दुथ्याः । थौंकन्हय् कान्तिपथं हे यात्रुत कयाः पर्यटकीय बस संचालन जुया वयाच्वंगु खःसां आः वइगु असार १६ गतेनिसें उगु थासं चिइकाः सो¥हखुट्टें बस संचालन याइगु जूगु दु ।

कान्तिपथं न्हियान्हिथं सुथसिया ७ ताःइलय् स्वदेशी व विदेशी पर्यटक ज्वनाः पोखरा, लुम्बिनी, सौराहा, चितवन लगायतया गन्तव्यय् वनेगु याना वयाच्वंगु खः । थथे पर्यटक कायेगु निंतिं च्वनाच्वनीगु पर्यटकीय बसया कारणं कान्तिपथ क्षेत्र तसकं हुलमुल जुइगु धासें उगु थासं पर्यटकीय बसपार्क चिइकेत्यंगु खः । बसपार्क चिइके धुंकाः ट्राफिक व्यवस्थापन सहज जुइगु अनुमान यानातःगु दु ।

गृहमन्त्रीया निर्देशनकथं कान्तिपथं बसपार्कयात चिइकाः न्हूगु बसपार्कय् स्थानान्तरण यायेगु तयारी जूगु खः । उकिया निंतिं येँ महानगरपालिका व ट्राफिक प्रहरीं आवश्यक तयारी न्ह्याकूगु खःसां व्यवसायीतय् विरोधया कारणं अस्थायी रुपं आःयात सो¥हखुट्टेय् तये यंकेत्यंगु खः ।