पुलांगु ज्वलं मछ्यःगुलिं विरोध
येँ – ग्वलय् च्वंगु जयबागेश्वरी देगः दयेकेगु ज्याय् परम्परागत ज्वलं मछ्यःगु खँय् स्थानीय जनतां विरोध याःगु दु । जगबागेश्वरी देगः न्हापा म्हासु चां दयेकातःगु खःसा आः अथे मयासे सुर्की व चुना छ्यलाः दयेकेत्यंगु धासें स्थानीयवासी जलदराज बैद्यं विरोध यानादीगु खः ।
पशुपति विकास कोषं देगः दयेकेगु निंतिं टेन्डर आह्वान याःगु खः । स्थानीय जनतां कोषयात पुरातात्विक महत्वया उगु देगः पुलांगु परम्परागत विधि व ज्वलं छ्यलाः दयेकेमाः धायेधुंकाः नं कोषं धाःसा उकी चिउताः मक्यंगु द्वपं नं वय्कलं बियादीगु दु ।
थःपिंसं म्हासु चां दयेकेत इनाप यानाबलय् म्हासु चा कायेत थाकुगुलिं आः चुना व सुर्की तयाः दयेकेगु धकाः कोषं लिसः बिउगु धासें वय्कलं म्हासु चा कायेत छुं नं कथंया समस्या मदुगु दावी यानादिल । माःसा थःपिंसं हे अज्याःगु चा कायेगु व्यवस्था याना बी धकाः थम्हं धयां नं कोषं अत्तेरी जुयाः ज्या यानाच्वंगु द्वपं नं वय्कलं बियादीगु दु ।
देगः दनेगु लागिं पुरातत्व विभागं बिउगु स्वीकृतिया अःखः जुइक ज्या यानाच्वंगु धासें उगु देगः मेगु चा तयाः दयेकेगु ज्या यात धाःसा अन च्वयेमाःगु भैलःद्यःया किपा तकं स्यनीगु चिउताः नं वय्कलं प्वंकादीगु दु ।
पशुपति लागाय् कोषं लाथेपाथे निर्माण यानाच्वंगु खँ कनादिसें थःपिंसं याकनं हे पुरातत्व विभागय् थुकिया बारे रिपोर्ट तयेगु तयारी यानाच्वनागु जानकारी वय्कलं बियादिल ।
छम्हं दातां जगबागेश्वरी देगः थःपिंसं दयेका बी धकाः प्रस्ताव तःगु खःसा उगु प्रस्तावय् देगः पुलांगु परम्परागत ढंगं मखुसें आधुनिक सामग्री छ्यलाः दयेकेगु धाःगुलिं स्थानीय जनतां उकिया विरोध याःगु खःसा वयां लिपा दाता लिहां वंगु खः । तर आः कोषं नं अथे यायेत्यंगु द्वपं वःगु दु ।
LEAVE YOUR COMMENTS