प्रमयात स्वंगू भासं ब्वनापौ, वैशाख २४ गतेया ज्याझ्वलय् प्रचण्ड मूपाहां
येँ (नेपालभाषा टाइम्स)÷ थ्वहे वइगु वैशाख २४ गते बागमती प्रदेशय् नेपालभाषा व तामाङ भाषायात नं सरकारी ज्याखँया भाषा कथंया मान्यता बीगु कानुन कार्यान्वयनय् वइगु न्हि कुन्हु जुइगु विशेष समारोहय् प्रधानमन्त्री पुष्पकमल दाहाल मू पाहां कथं झाइगु जूगु दु ।
दाहालयात उगु ज्याझ्वलय् मूपाहां कथं झायेत इनाप यासें म्हिगः बागमती प्रदेश सरकारपाखें मुख्यमन्त्री शालिकराम जम्कट्टेल सहित वंगु सरकारया पुचलं प्रम दाहालयात स्वंगू भासं च्वयातःगु ब्वनापौ लःल्हाःगु खः । बागमती प्रदेश सरकारया संस्कृति मन्त्री शैलेन्द्र वज्राचार्यं प्रम दाहालयात कलात्मक झ्याःया फ्रेमय् तयातःगु उगु ब्वनापौ लःल्हानादीगु खः । उगु इलय् मुख्यमन्त्री जम्कट्टेललिसें प्रदेशया कानुन मन्त्री गंगानारायण श्रेष्ठ, नेवाः देय् दबूया नायः पवित्र वज्राचार्य, पुलांम्ह नायः नरेश ताम्राकार लिसें तामाङ घेदुङया प्रतिनिधिपिं नं दुगु खः । प्रमयात बिउगु ब्वनापौ खस नेपाली लिसें नेपालभाषा व तामाङ भाषां च्वयातःगु खः । प्रम दाहालं थ्व ऐतिहासिक न्हिया लसताय् जुइगु ज्याझ्वलय् थम्हं ब्वति कायेगु बचं बियादीगु खः ।
वैशाख २४ गते बागमती प्रदेश सरकारपाखें येँया बसन्तपुलिइ थ्व विशेष ज्याझ्वः यायेगु ग्वसाः जुयाच्वंगु दु । उकी प्रम दाहाल मू पाहां व बागमती प्रदेशया मुख्यमन्त्री जम्कट्टेल विशेष पाहां कथं झाइगु खँ प्रदेशया संस्कृतिमन्त्री वज्राचार्यं कनादिल ।
LEAVE YOUR COMMENTS