राजेन्द्र महतों न्हूगु पार्टी चायेकीगु

येँ (नेपालभाषा टाइम्स)- राजेन्द्र महतो नेतृत्वया राष्ट्रिय मुक्ति क्रान्तिं न्हूगु पार्टी दयेकीगु जूगु दु । थुकिया नितिं थ्व संस्थां कार्ययोजना दयेकेधुंकूगु दुसा कार्यकारिणी समितिं उकियात पारित यायेवं थ्वहे वइगु कार्तिकय् पार्टी घोषणा जुइगु खँ नेता केशव झां कनादीगु दु ।

उकथं हे राष्ट्रिय मुक्ति क्रान्तिया मेम्ह नेता सन्तोष मेहतां वइगु कार्तिकय् छगू गोलमेच सम्मेलन यायेगु व उगु हे सम्मेलनं पार्टी घोषणा याइगु खँ कनादीगु दु । गोलमेच सम्मेलनय् थीथी राजनीतिक दल, संघसंस्था, पत्रकार, बुद्धिजीवी, वकिल लगायत थीथी तहया मनूतय्सं ब्वति काइगु व सम्मेलनं वःगु निष्कर्ष कथं पार्टीया घोषणा याइगु ग्वसाः दु ।

पार्टी घोषणा यायेन्ह्यः राष्ट्रिय मुक्ति क्रान्तिं सिडिओ कार्यालय खारेज यायेगु अभियान न्ह्याकीगु जूगु दु । असोज ३ गते संविधान दिवसनिसें थ्व अभियान न्ह्याकीगु ग्वसाः दु । संविधानं म्हमसिउगु सिडिओ कार्यालय चीकेगु अभियान देय्न्यंकं न्ह्याकेगु निर्णय याःगु दु ।

पार्टी घोषणा जुइधुंकाः निर्वाचन आयोगय् दर्ता याकेगु व वयां लिपा पार्टीपाखें प्रधानमन्त्रीयात अल्टिमेटम सहित ज्ञापन पौ बीगु तयारी जुयाच्वंगु दु । उगु अल्टिमेटम झिंन्यान्हु वा लछिया जुइगु खँ धाःगु दु । अल्टिमेटम दुने माग पूमवन धाःसा तप्यंक आन्दोलनय् वनेगु तयारी नं राष्ट्रिय मुक्ति क्रान्तिं याःगु दु । थ्व संस्थां देशय् बहुराष्ट्रिय व्यवस्था जुइमाः धकाः माग याना वयाच्वंगु दु ।