तोखाया चाकुयात ब्राण्डिङ याइगु
येँ- तोखा नगरपालिकां वइगु आर्थिक दँ ०७९÷८०या निंतिं बजेट सार्वजनिक याःगु दु । नगरपालिकां वइगु आर्थिक दँया निंतिं निगू अर्ब झिंछगू करोड न्यय्खुगू लख न्हय्द्वः तका बराबरया वार्षिक आयव्यय विवरण प्रस्तुत याःगु खः ।
ऐतिहासिक, सांस्कृतिक व पर्यटकीय नगरी तोखाया नगर प्रमुख प्रकाश अधिकारींवइगु आर्थिक दँया नीति तथा कार्यक्रम कार्यान्वयन यायेगु ल्याखं ११ क्वःगु नगरसभाय् उगु बजेट प्रस्तुत यानादीगु खः ।
नगरपालिकां चाकु उत्पादनया निंतिं अतिकं नांजाःगु तोखाया चाकुयात ब्राण्डिङ याइगु जूगु दु । तोखा नगरपालिकां वइगु आर्थिक दँया निंतिं सार्वजनिक याःगु नीति तथा कार्यक्रमय् उगु खँ न्ह्यथनातःगु दु ।
नगर प्रमुख अधिकारीं नीति तथा कार्यक्रम न्ह्यब्वयेगु झ्वलय् चालु आर्थिक दँय् सम्झौता जुयाः आर्थिक दँया अन्त्यतकया दुने कार्यान्वयन जुइ मफइगु योजना व कार्यक्रमयात क्रमागत रुपं निरन्तरता बिया वनेगु खँ धयादीगु दु ।
नीति तथा कार्यक्रमय् नगरया सुरक्षाया निंतिं मुख्य मुख्य थासय् सीसी क्यामरा, त्वाः त्वालय् सुरक्षा साइरन जडान यायेगु नगरपालिका व वडा ज्याकुथिइ निःशुल्क वाइफाइया व्यवस्था यायेगु, अनलाइनपाखें राजस्व पुलेगु प्रणाली लागू यायेगु नीति काःगु दु ।
LEAVE YOUR COMMENTS