मचा सिरपाःया निंतिं मस्त ल्यल

येँ – नेपालभाषा मचा सिरपाःया निंतिं मस्त ल्ययेगु ज्या जूगु दु । नेवाः बस्ती नेवाः स्कुल अभियानया ग्वसालय् वंगु शनिवाः थनया ताम्सिपाखाय् च्वंगु न्यू जेनिथ इंग्लिश मोडेल स्कुलय् जूगु ‘अडिसन’पाखें थीथी ब्वनेकुथिया नीम्ह मस्त छनोट याःगु खः ।

नर्सरीनिसें युकेजी तगिंया मस्तलिसे खँल्हाबल्हा, तगिं छगू व निगूया मस्तलिसे खँल्हाबल्हा व ब्वँज्या व तगिं स्वंगूनिसें न्यागू तकया मस्तलिसे च्वज्या, खँल्हाबल्हा व ब्वँज्याया लिधंसाय् दकलय् बांलाःपिं नीम्ह मस्त छनोट याःगु खः । मस्त ल्ययेगु निंतिं ल्याज्या पुचलय् उदेन न्हूसाय्मि, जियम श्रेष्ठ, पवित्र कसा, विराजकाजी राजोपाध्याय, रविन श्रेष्ठ, राकेश महर्जन व रेखा शाक्य, च्वनादीगु खः ।

मस्तय्त नेपालभाषां खँल्हाबल्हा, ब्वनेगु व ब्वंकेगुलिइ हःपाः बीकथं थगुनेनिसें थुकथंया ज्याझ्वः न्ह्याकूगु खः । थुगुसी जूगु कासाय् नेपलभाषां आखः ब्वंका वयाच्वंगु तोखा, थसि, लुभु, किपू, थक्वाः, ख्वप, सुनागुथिलिसें स्वनिगःया थीथी पीस्वंगू स्कुलया चय्म्हं मल्याक विद्यार्थीतय्सं ब्वति काःगु खः ।

मस्तय्त ब्वति कायेकेया निंतिं स्यनामिया संयोजन सोनी श्रेष्ठं यानादीगु खःसा अभियानया संयोजक दीपक तुलाधरया संयोजनय् जूगु थुगु ज्याझ्वःया निंतिं सुनिलकुमार शाक्यं आर्थिक संयोजन याना वयाच्वनादीगु खः । भाजु शाक्यं संकलन जूगु १७ गू लाख दामं कोष स्वनाः दँय्दसं थुगु ज्याझ्वः अभियानपाखें यायेगुकथं याना वयाच्वंगु खः ।

शनिवाः जूगु ज्याझ्वःया हे दथुइ ब्वति कयादीपिं सकलें मस्तय्त थीथी दातापिंसं उपलब्ध यानादीगु, न्ह्यब्वःसा, चकलेट, स्टेशनरी ज्वललिसें लुमन्ति चिं नं लःल्हाःगु खःसा उत्कृष्ट जुयादीपिं मस्तय् वइगु कात्तिक २ गते छगू ज्याझ्वः यासें सिरपाः लःल्हायेगु अभियानया संयोजक तुलाधरं जानकारी बियादीगु दु । थगुने न्हापांखुसी जूगु कासाय् नेपालभाषां आखः ब्वंका वयाच्वंगु स्वीनिगू स्कुलं ब्वति काःगु खः ।