यलया स्वंगू विद्यालयय् रोबोट दयेकेगु शिक्षा
यल – यल महानगरपालिकाया स्वंगू विद्यालयय् वइगु शैक्षिक सत्रनिसें ‘रोबोट प्रोग्रामिङ शिक्षा’ लागू याइगु जूगु दु । यल मनपां आः वइगु न्हूगु शैक्षिक सत्रनिसें विद्यालय शिक्षणय् स्यनेकने यायेगु न्हूगु प्रविधि प्रयोग यायेगु ल्याखं रोबोट दयेकेगु तालिमकथं उगु शिक्षा लागू यायेत्यंगु खः ।
यल मनपां थौंया इलय् प्राविधिक शिक्षायात न्ह्यःने यंकेमाःगु आवश्यकतायात महसुस यासें उकथंया शैक्षिक ज्याझ्वः न्ह्याकेत्यंगु खः ।
मनपां वइगु बैशाखंनिसें यशोधरा बौद्ध माध्यमिक विद्यालय, जलपा माध्यमिक विद्यालय हिन्दू विद्यापीठ नेपाल यानाः स्वंगू विद्यालयय् रोबोट दयेकेगु तालिम सम्बन्धी शिक्षा लागू यायेत्यंगु खः ।
थ्व स्वंगुलिं विद्यालयय् खुगू निसें झिगू तगिं तकया विद्यार्थीया निंतिं उगु शिक्षा लागू जुइगु स्रोत व्यक्ति सत्यनारायण महर्जनं जानकारी बियादिल । वंगु फागुन १८ निसें ३० तक योजना न्ह्यःने यंकूगु स्वंगू विद्यालयया खुम्ह शिक्षक, साझा ई पाटी नेपालया प्यम्ह, पुल्चोक इन्जिनियरिंग क्याम्पस रोबोटिक्स क्लबया निम्ह विद्यार्थी व यशोधरा बौद्ध माध्यमिक विद्यालयया प्रधानाध्यापक व यल मनपाया स्रोत व्यक्ति नापं यानाः मुक्कं झिंप्यम्हेसित रोबोट दयेकेगु सम्बन्धी तालिम बी धुंकूगु दु ।
अथे हे वंगु चैत १ निसें यशोधराया न्हय्गू तगिमय् ब्वनाच्वंपिं १८ म्ह विद्यार्थीयात उगु तालिम बीगु नापं रोबोट दयेकेगु ज्या तकं जुइधुंकूगु दु ।थुकथं हे यल मनपां प्राविधिक शिक्षायात न्ह्यःने यंकेगु योजना न्ह्यःने हयेवं वंगु फागुनय् जापानया म्यागि विश्वविद्यालयया प्रोफेसर मिजु तानिं रोबोट निर्माण सम्बन्धी जानकारी बियादीगु खः ।
LEAVE YOUR COMMENTS