महागुथि सहकारीया रजत दँ हन
येँ (नेपालभाषा टाइम्स)- ज्यापु समुदायया आर्थिक समृद्धि व उमिगु जीवन स्तर थकायेगु ताः तयाः संचालन याना वयाच्वंगु महागुथि बहुउद्देश्यीय सहकारीया २५ क्वःगु साधारण सभा व रजत दँ हंगु दु । वंगु शनिवाः विनायक मल्टि भेन्यु जूगु साधारण सभा व रजत दँ ज्याझ्वःया उलेज्या बागमति प्रदेशया कृषि तथा पशुपंक्षी विकास मन्त्री प्रकाश श्रेष्ठं यानादिल ।
महागुथि सहकारीं नीन्याक्वःगु साधारण सभा यायेत ताःलाःगुलिं भिंतुना देछायादिसें मूपाहाँ मन्त्री श्रेष्ठं वइगु इलय् नं सहकारी थःगु उद्देश्य कथं ज्या याना वनेफयेमा धकाः भिंतुना देछायादिल । अथेहे नेवाः देय् दबूया नायः पवित्र वज्राचार्य, ज्यापु महागुथि नेपाःया नायः सत्यनारायण डंगोल, महानगर समितिया अध्यक्ष पंचनारायण महर्जन व सहकारीया निवर्तमान अध्यक्ष मचाराजा महर्जनं नं ज्याझ्वलय् थःथःगु नुगःखँ तयादीगु खः ।
महागुथि सहकारीया रजत महोत्सवया लसताय् सदस्यपिनिगु निंतिं निःशुल्क स्वास्थ्य शिविर, हिदान ज्याझ्वः नं जूगु खः । अथेहे दुजःपिंत नेपाल संवत् ११४५ या क्यालेन्डर नं इनाबिउगु खः । ज्याझ्वलय् सहकारीया ज्येष्ठ दुजःपिं, असल दुजःपिं लिसें सहकारी निरन्तर न्ह्याकेत २५ दँ न्ह्यवनिसें योगदान यानावःपिं लिसें कर्मचारीतय्त नं सम्मान याःगु खः ।
महागुथि सहकारी आर्थिक दँ २०८०÷८१ या लबः पाखें ११.५४ प्रतिशत लाभांश बिउगु खः । सहकारीया थौंकन्हय् शेयर पुँजी २ करोड ८९ लाख दुसा जगेडा कोष ३ करोड १५ लाख ५६ हजार दु । अथेहे सरकारीपाखें आःतक ३४ करोड ८८ लाख ८९ हजार निक्षेप मुंकूगु दुसा २३ करोड ३१ लाख ८१ हजार त्यासा बियातःगु दु ।
साधारण सभां मचाराजा महर्जन मुसुंबहाःया अध्यक्षताय् न्हूगु ज्यासना पुचः नं ल्यःगु दु । सर्वसम्मतिं ल्यःगु न्हूगु ज्यासना पुचलय् न्वकु बाबुराजा प्रजापति, छ्याञ्जे कुलबहादुर महर्जन, दांभरिं कुमार डंगोलयात ल्यःगु दुसा दुजलय् राजभाइ महर्जन, पन्नारत्न महर्जन, गोविन्द महर्जन, गम्भीरमान महर्जन व अनिता डंगोलयात ल्यःगु दु । अथेहे लेखा समितिया संयोजकय् रेणुका बासुकला व दुजलय् हिराकाजी महर्जन व नानीकाजी महर्जनयात ल्यःगु दु ।
LEAVE YOUR COMMENTS