किपू नगरपालिकाय् नं शैक्षिक त्यासा सुरु

येँ – किपू नगरपालिकां नं थुगुसी निसें शैक्षिक त्यासा बीगु सुरु याःगु दु । किपू नगरपालिकां म्हिगः याःगु नियमित पत्रकार सम्मेलनय् थुकिया जानकारी बिउगु खः । पत्रकार सम्मेलन न्ववासें किपू नगरपालिकाया उपप्रमुख व प्रवक्ता सरस्वती रिजाल (खड्का) नगरपालिकां शैक्षिक त्यासा बीगु सुरु यायेधुंकूगु जानकारी बियादीगु खः ।

किपू नगरपालिकां प्राविधिक शिक्षाया निंतिं थ्व त्यासा बीगु खँ नपाया शिक्षा विभाग प्रमुखं धाःगु दु । नगरपालिकां थुगुसी नीम्हेसित थ्व त्यासा बीत्यंगु खःसा आःतक निम्हेस्यां ध्यबा यंकेधुंकूगु जानकारी नं बिउगु दु । नगरपालिकां प्रत्येक वडां निम्हेसिया ल्याखं नीम्हेसित शैक्षिक त्यासा बीत्यंगु खः । थुकिया निंतिं नगरपालिकां छगू करोडया बजेट नं फ्यानातःगु दु ।

शिक्षा विभागया कथं शैक्षिक प्रमाणपत्र बरः तयाः छम्हेसित न्यागू लाख तका तक त्यासा बी । थ्व त्यासा ध्यबा तप्यंक त्यासा काइम्हेसित धाःसा बीमखु, वं गुगु कलेजय् ब्वनीगु खः अन नगरपालिकां पुलेगु कथं ध्यबा बी । त्यासा कायेगु निंतिं वडाया सिफारिस सहित निवेदन तयेमाःगु खँ शिक्षा विभाग प्रमुखं धयादीगु दु । प्रमुखया कथं आःतक न्हय्म्हेसिया त्यासा निवेदन स्वीकृत जुइ धुंकूगु दुसा थुकी मध्ये निम्हेसिगु ध्यबा निकासा नं जुइधुंकूगु दु । मेपिं न्याम्हेसिया नं याकनं हे निकासा जुइगु खँ धाःगु दु ।

अथेहे उपमेयर रिजालं किपू नगरपालिका दुने लाःगु त्रिभुवन विश्वविद्यालयं थीथी भवन दयेकेबलय् नगरपालिकापाखें नक्सा स्वीकृति यायेगु ज्या मजूगु खँ धयादीगु दु । त्रिवि दुने प्रहरी ज्याकू तयेगु निंतिं दयेकूगु भवनया निंतिं नं स्वीकृति मकाःगु खँ वय्कलं धयादीगु दु । वय्कलं त्रिविलिसे भवन दयेकेबलय् नगरपालिकापाखें स्वीकृति कायेकेगु निंतिं कुतः जुयाच्वंगु खःसां त्रिविं धाःसा वास्ता मयानाच्वंगु खँ नं धयादिल । अथेहे वय्कलं नेपाल भ्रमण वर्ष २०२०या निंतिं नं नगरपालिकापाखें तयारी यानाच्वंगु जानकारी नं बियादिल ।