ने. सं. ११४४ कछलागा षष्ठी -

सुन्दरतायात ख्याच्वः !

संसारय् बांलाःपिं मिसा खनाः भुतुक्क मजुइपिं मिजं शायद हे जक दइ जुइ । अज्याःपिं बांलाःपिं मिसाया न्ह्यःने वनाः वा नापं च्वनाः फोटो कायेगु रहर सुया मदइ ? अझ इमिसं हे नापं च्वनाः फोटो कायेत इनाप यासें ल्हाः साल धाःसा ला झन् थःगु म्हगस हे पूवं थें नं जुइ ।
तर गुलि गुलिं मिसातय्त धाःसा थःगु बांलाःगु रुप व आकर्षक शरीर थःगु हे निंतिं अभिशाप वा समस्या जुया बी यः ।

जर्मनीइ छम्ह मिसा प्रहरी अधिकारी दु, वयागु नां एड्रियन कोलेसजर खः । थुम्ह मिसाम्ह प्रहरी अधिकारीयात विश्वया हे दकलय बांलाःम्ह मिसा प्रहरी धकाः नं धायेगु याः । तर कोलेसजर थःगु सुन्दरताया कारणं थः हे समस्याय् लाःगु दु । थःगु आकर्षक म्ह, सुन्दर रुपया किपाया कारणं गाक्कं प्रशंसा मुनाच्वंम्ह कोलेसजरयात वं ज्या यानाच्वंगु ज्याकूपाखें हे ख्याच्वः बिउगु दु ।

वयागु विभागं वयात थःगु छुं नं किपा सामाजिक संजालय् सेयर मयायेत धासें सचेत याकूगु दु । कोलेसजर ज्या यानाच्वंगु विभागया वरिष्ठ प्रहरी अधिकारीतय् धापू दु कि थथे बांलाःम्ह मिसां थःगु किपा सेयर याइबलय् अपराधीतय्त इमिगु अपराध कर्म यायेत प्रेरित यानाच्वनी ।
थःगु अप्वः थें किपा इन्स्टाग्रामय् सेयर यायेगु याना वयाच्वंम्ह कोलेसजरया थःगु यइपुसे, बांलासेव छाइसे च्वंगु म्हगः उकिसन बिकिनी पुनातःगु सेक्सी किपाया कारण व तसकं चर्चित जुया वनाच्वंगु दु ।

वया लखौंलख फलोअर्स दु । वयागु रुप, सौन्दर्यताया कारणं मनूत अपराधपाखे उन्मुख जुइगु व वयागु हे ल्हातं ज्वंकेत अथक कुतः याइपिं अप्वया वनाच्वंगु दु । वयागु कारणं आपराधिक गतिविधि अप्वया वनाच्वंगु धासें विभागं वयागु गुगुं नं बांलाःगु किपा सामाजिक संजालय् सेयर मयायेत ख्याच्वः तकं बिउगु खः ।

जर्मनीया वरिष्ठ प्रहरी कमिश्नर कोलेसजरयात फलोअर्सतय्सं वयागु ल्हातं गिरफ्तार जुइत तयार धासें सामाजिक संजालय् तकं च्वया हयेगु यानाच्वंगु दु । सामाजिक संजालय् जक १३ गू लाख स्वयां अप्वः फलोअर्स दु । अप्वः फलोअर्स दुगुलिं हे धमाधम किपा सेयर यायेवं उकियात लाइक व कमेन्ट याइपिं नं उत्तिकं अप्वया वनाच्वंगु दु, गुगु वयागु विभागया निंतिं कपाः स्याःगु विषय खः ।

बडी फिटनेसया सौखिन कोलेसजर छम्ह प्रहरी अधिकारी जुयाः थःगु कर्तव्य पालना यायेगु स्वयां नं मोडल वा सेलिब्रिटीं थें थःगु म्ह व फोटो सेसनयात अप्वः ध्यान बियाच्वंगु धासें थगुने वयात खुलाया छुट्टी तकं बिउगु खः । अवैतनिक रुपं विदा बियाः वयात भिनेगु मौका बिउगु खःसां छुट्टी सिधयेकाः लिहां वःम्ह कोलेसजरया पुलांगु बानीइ धाःसा छुं हे सुधार मजुइवं वयात ख्याच्वः हे बीमाःगु स्थिति वःगु खः ।