काश्मिरय् भारत–पाकिस्तान दथुइ गोलावारी

काश्मिर सीमाय् गोलावारी जुइवं भारत व पाकिस्तान दथुइ हाकनं तनाव तच्वःगु दु । निगुलिं देशं वं वयात वं वयात गोली कयेकूगु द्वपं बियाच्वंगु दु । थ्व घटनाय् निखेरं सैनिक व गैरसैनिक नागरिक सीगु खँ धाःगु दु । निगुलिं पक्षं वं वयात वं वयात युद्धविराम भंग याःगु व थःपिंसं प्रतिकार यानागु दावी यानाच्वगु दु ।

भारत प्रशासित काश्मिरय् संविधानं बियातःगु विशेषाधिकारयात भारतीय सरकारं खारेज यानाबीवं निगुलिं देय् दथुइ तनाव तच्वया च्वंगु दु । पाकिस्तानं भारतं याःगु निर्णय विरुद्ध अन्तर्राष्ट्रिय समर्थत चूलाकेगु कुतः यानाच्वंगु दु । भारत व पाकिस्तान निगुल देशं काश्मिरय् थःगु स्वामित्व दयेमाःगु दावी यानाच्वंगु दु ।

सन् २००३ य् काश्मिरय् युद्धविराम यायेगु सहमति जूगु खः । तर थुगुसी सुरु जुयाच्वंगु तनावं उगु सहमति जोखिमय् लाकूगु दु । सीमावर्ती कुपवारा जिल्लाया निगू गामय् आइतबार गोलावारी जूगु खः । तर निगुलिं पक्षं फरक फरक खँ धयाच्वंगु दु । पाकिस्तानं गैरसैनिकतय्त लक्षित याःगु द्वपं भारतं बियाच्वंगु दु ।

भारतया कथं पाकिस्तानं कयेकूगु गोलीं छम्ह सर्वसाधारण सीगु दुसा स्वम्ह घाःपाः जूगु दु ।भारतया सेनाप्रमुख विपिन राउतं भारतीय पक्षं लडाकुतय्त लक्षित यानाः प्रतिकार याःबलय् म्होतिं नं खुम्ह पाकिस्तानी सैनिक सीगु व स्वंगू शिविर नष्ट जूगु खँ सञ्चार माध्यमयात धाःगु दु ।

मेखे पाकिस्तानी सेनाया प्रवक्ता असिफ गफूरं भारतं युद्धविराम भंग याःगु व नियतवश गैरसैनिकतय्त लक्षित याःगु द्वपं बिउगु दु । वय्कलं नं थःपिनि प्रतिकारय् भारतीय सैनिकया ज्यान वंगु व मेपिं घाःपाः जूगु खँ धाःगु दु ।

सम्बन्धित बुखँ

LEAVE YOUR COMMENTS