लुम्बिनीइ अन्तर्राष्ट्रिय विश्व शान्ति सम्मेलन
येँ(नेपालभाषा टाइम्स)÷ बुद्ध जन्मस्थल लुम्बिनीइ विहीवाःनिसें निन्हुयंकंया अन्तर्राष्ट्रिय सम्मेलन न्ह्याःगु दु । ‘समृद्धिया लागि विश्व शान्ति’ विषयक अन्तर्राष्ट्रिय सम्मेलनय् थीथी देशया गैरआवासीय राजदूत, नेपाःया लागि अवैतनिक वाणिज्यदूतहरू, उच्च सरकारी अधिकारी, पर्यटन ख्यःया विज्ञपिंसं ब्वति कयाच्वंगु दु ।
सम्मेलनय् थीथी झिंगुंगू देशया गैरआवासीय राजदूतपिं लुम्बिनीइ मुंगु खः । सम्मेलनय् ब्वति कायेत अस्ट्रिया, बुल्गेरिया, इस्टोनिया, चेक रिपब्लिक, मौरिसस, मङ्गोलिया, इन्डोनेसिया, तान्जानिया, सर्बिया, स्लोभेनिया, साइप्रस, आयरल्यान्ड, स्पेन, लात्भिया, कोस्टारिका, पोल्यान्ड व डोमिनिक रिपब्लिक, रोमानिया आदि देय्या गैरआवासीय राजदूतपिं विहीवाः हे भैरहवा थ्यंकः वःगु खः ।
परराष्ट्र मन्त्रालय व अन्तर कन्सुलर कर्पस नेपालंं मंकाःकथं बुद्ध जन्मस्थल लुम्बिनीया प्रचारप्रसार, पर्यटन प्रवद्र्धनलिसें विश्व शान्ति सन्देशया निंतिं सम्मेलनया ग्वसाः ग्वःगु खः । सम्मेलनय् नेपालय् लगानीया अवसर, पर्यटन प्रवद्र्धन, लुम्बिनीया अन्तर्राष्ट्रिय महत्व लगायत थीथी विषयय् सहलह व प्रस्तुति याःगु खः ।
उपप्रधानलिसें परराष्ट्रमन्त्री नारायणकाजी श्रेष्ठ, संस्कृति, पर्यटन तथा नागरिक उड्डयनमन्त्री हितबहादुर तामाङया नं सहभागिता दुगु सम्मेलनय् नेपाल पर्यटन बोर्ड व लगानी बोर्डं ग्वाहालि याःगु खः ।
ज्याझ्वःया उलेज्या यासें उपप्रधानमन्त्री व परराष्ट्रमन्त्री नारायणकाजी श्रेष्ठं लुम्बिनी बुद्ध जन्मस्थल जक मखसे बौद्ध दर्शनया हे उद्गमस्थल जूगु खँ धयादिल । विश्वशान्तिया निंतिं बः बियादिसें वय्कलं थीथी देशय् जुयाच्वंगु द्वन्द्वं आर्थिक संकटया लिसें मेमेगु समस्या नं तच्वया वःगु खँ धयादिल । शान्ति व समृद्धिया निंतिं बहस यायेत दकलय् उत्तम थाय् लुम्बिनी जूगु खँ धयादिसें वय्कलं थन सम्मेलन याःगुलिं ग्वसाः खलःयात सुभाय् नं देछायादीगु खः ।
LEAVE YOUR COMMENTS