स्वनिगःया थीथी थासय् जेब्रा क्रसिङ

येँ – महानगरीय ट्राफिक प्रहरी महाशाखां स्वनिगःया थीथी थासय् सवारी साधन व यात्रुतय् सहजताया निंतिं जेब्रा क्रसिङ निर्माण व मर्मत याःगु दु । महाशाखां स्वनिगःया ट्राफिक व्यवस्थापन व प्रदूषण नियन्त्रणया निंतिं न्ह्याकूगु स्वलाया कार्ययोजना कथं उकथं जेब्रा क्रसिङ निर्माण व मर्मत याःगु खः ।

महाशाखां बिउगु जानकारीकथं धुम्बाराही, चप्पल कारखाना, हिजाखुसी, लुँहिति, महांकाल, सुकेधारा, गौशाला, शंखपार्क, त्रिचन्द्र क्याम्पस, जय नेपाल आदि थासय् जेब्रा क्रसिङ निर्माण व मर्मत याःगु खः ।अथे हे फिब्व ख्यः (माइतीघर), न्हू बानेश्वर, कमलपुखू, गै¥हीधारा, कमलपुखू कृष्ण पाउरोटी, ज्ञानेश्वर, भद्रकाली, सिंहदरवार, सिटी सेन्टर लगायतया थासय् जेब्रा क्रसिङ नं निर्माण याःगु दु ।

महाशाखां स्वनिगलय् लिपांगु इलय् अत्याधिक रुपं अप्वया वनाच्वंगु सवारीया चापयात व्यवस्थि यायेगु नापं सवारी दुर्घटना न्यूनीकरणया निंतिं स्वलाया कार्ययोजना दयेकाः ज्या याःगु खः । महाशाखां वंगु २०७५ चैत २१ ग्तनिसें स्वनिगःया ट्राफिकय् सुधार हयेगु ल्याखं उकथंया कार्ययोजना दयेकाः ज्या याना वयाच्वंगु खः ।

थ्व हे झ्वलय् महाशाखां कार्ययोजना दयेकाः न्ह्याः वनेगु झ्वलय् आतकयादुने ४४,३०० सवारी साधनयात न्यागू मिनेटया सचेतना कक्षा संचालन यायेगु नापं स्टिकर व पम्पलेट वितरण, चाबही, सुकेधारा, सानेपा, त्रिचन्द्र, लुँहिति, सिंहदरवार लगायतया थासय् स्टप लाइन निर्माण व मर्मत याःगु दु ।

अथे हे न्हू बानेश्वरनिसें पुलांगु बानेश्वर, न्हू बानेश्वरनिसें हे शंखम्वः, कोटेश्वरनिसें गौशाला, लैनचौरस्थित खानी विभागनिसें महाराजगंजतक व गौशालानिसें चाबहीतकया फुटपाथ व सतक पार्किङ चिइकूगु दु ।