दाहालयात न्हापा थें धोका मबीत चितवन कांग्रेसया ख्याच्वः

येँ (नेपालभाषा टाइम्स)- प्रधानमन्त्री लिसें नेपाली कांग्रेसया सभापति शेरबहादुर देउवां गुगुं नं पार्टी बहुमत हयेफइगु अवस्था मदुगुलिं गठबन्धन यायेमाःगु खँ धयादीगु दु । म्हिगः चितवनय् जूगु चुनावी सभाय् न्ववासें प्रधानमन्त्री देउवां उगु खँ धयादीगु खः । वय्कलं गठबन्धन त्वाःथलेगु आपालं षडयन्त्र जूसां नं उकियात थःपिंसं परास्त यायेगु जुइ धयादिल ।

उकथं हे गठबन्धन दल एकीकृत समाजवादीया अध्यक्ष माधव नेपालं मेयरया उम्मेदवार रेनु दाहालयात पुष्पकमल दाहालया म्ह्याय् कथं जक थुइके मजिउगु खँ धयादिल । वय्कलं सुं योग्य जूसा योग्यताया आधारय् उम्मेदवार जुइगु खँ धासें धयादिल, ‘सुं नं योग्य दुसा योग्यताया आधारय् वनेगु खः, अबुया आधारय् मखु, सुं योग्य दुसा म्ह्याय् धकाः पनेगु ज्या नं याये मजिउ ।’

उकथं हे चुनावी सभाय् न्ववायेगु झ्वलय् कांग्रेसया वरिष्ठ नेता रामचन्द्र पौडेलं थःपिनिगु प्रतिस्पर्धा प्रचण्ड लिसे मखुसें केपी शर्मा ओली लिसे खः धयादिल । वय्कलं केपी ओली देय्यात अस्तिरतापाखे यंकेत स्वःगुलिं गठबन्धन यायेमाःगु खँ नं धयादीगु दु ।

अथे हे सभाय् न्ववासें नेकपा माओवादी केन्द्रया अध्यक्ष पुष्पकमल दाहालं नं आःया गठबन्धन देय्या आवश्यकता जूगु खँ धयादिल । उकथं हे वय्कलं गठबन्धनया भविष्य भरतपुरया चुनावी नतिजां निर्धारण यायेफइगु खँ नं धयादीगु दु । अध्यक्ष दाहालं धयादिल, ‘थ्व गठबन्धन १०÷१५ दँ तक न्ह्यःने न्ह्याके फइ, चितवनया जनताया ल्हातय् फैसला यायेगु ई वःगु दु, रेनु दाहालसहित टिमयात विजयी याकादी धकाः जि तसकं उत्साहित जुया ।’

म्हिगःया सभाय् न्ववायेगु झ्वलय् कांग्रेस चितवनया पुलांम्ह सभापति जितनारायण श्रेष्ठं माओवादी केन्द्रया अध्यक्ष पुष्पकमल दाहलयात न्यादँ न्ह्यः थें धोका मबीत इनाप यानादिल । वय्कलं कांग्रेस सभापति शेरबहादुर देउवा सोझा जूगुलिं छु धाल व माने जुइ धासें विगतय् थें तुं धोका मबीत इनाप यानादीगु खः ।

उकथं हे ज्याझ्वलय् भरतपुर महानगरपालिकाय् सत्तारुढ गठबन्धनया मेयर उम्मेदवार रेनु दाहालं भरतपुरय् विकासया ज्या न्ह्यायेधुंकूगुलिं उकियात पूर्णता बीत थम्हं हाकनं उम्मेदवारी बियागु खँ कनादिल ।