बेलायती सेनाय् मिसा छ्वये मते

येँ – संसदीय समितिं बेलायती सेनाय् नेपाःमि मिसापिंत मछ्वयेत निर्देशन बिउगु दु । ब्रिटिस सेनाय् २०३ दँ निसें ब्रिगेड अफ गोर्खाज अभिन्न अंग थें जुयाच्वंगु दु । बेलायतं नकतिनि जक सन् २०२० तक नेपाःमि मिसापिंत नं भर्ना कायेगु खँ धाःगु खः । तर संसदया अन्तर्राष्ट्रिय सम्बन्धन समितिं नेपाःमि मिसापिंत बेलायती सेनाय् मछ्येत धाःगु दु ।

यदि छुं ब्रिटिस सेनाय् भर्ना जुयाच्वंगु दुसा उमित लित सःतेत नं समितिं निर्देशन बिउगु दु । नेपाःमि मिसापि बेलायती सेनाय् वनिगु प्रक्रियाय् दुगु खँ पिहां वःसां नं थुकिया बारे संसदीय समितियाके छुं हे जानकारी मदुगु खँ धाःगु दु । २०३ दँ न्ह्यवंनिसें नेपाःमि बेलायती सेनाय् ज्या यानाच्वंगु खःसां नं गुलि सित, गुलि घाइते जुल धइगु तथ्यांकं तकं ब्रिटिस सरकारं नेपाःयात बिउगु मदुनिगु खँ सीदुगु दु ।

न्हापांगु व निक्वःगु विश्व युद्धय् सीपिनिगु छेँजः पिनिगु विजोग जुयाच्वंगु दुसा तलब नं समान मदुगु धासें समितिं अज्याःगु थासय् छाय् नेपाःमि मिसापिंत छ्वयेत्यंगु खः धइगु न्ह्यसः नं तःगु दु । लिसें समितिं नेपाःमि मिसापिंत बेलायती सेनाय् छ्वयेत अस्वीकार यायेमाःगु ठहर याःगु दु ।

अथेहे समितिं पुलांपिं गोर्खा सैनिकं न्याय व समानताया निंतिं ल्ह्वंगु माग व समस्याया समाधानया निंतिं कुतः यायेत नं सरकारयात निर्देशन बिउगु दु ।