न्यत तुलाधरया भिंतुना कालबिल

येँ – न्यत तुलाधर समितिया ग्वसालय् नेपाल संवत् ११४० न्हूदँया लसताय् भिंतुना कालबिल व ज्याथजिथि हनाज्याझ्वः जुल । समितिया नायः संसारधर तुलाधरया सभापतित्वय् न्ह्याःगु ज्याझ्वलय् उदाय समाजया नायः डा. रुपज्योति कसाः मूपाहांकथं झायादीगु खःसा ज्याझ्वःया उलेज्या त्यंघः त्वाः कवःया थाकुलि जितरत्न तुलाधरं त्वाःदेवाय् मत च्याकाः उलेज्या यानादीगु खः ।

न्वकु भाइराजा तुलाधरं लसकुस यानादीगु ज्याझ्वलय् समितिया जंक्व पुलेधुंकूपिं ज्याथजिथिपिं नापं छगूनिसें स्नातकोत्तर तहय् उत्तीर्ण जुयादीपिंत सिरपाः, छात्रवृत्ति व दसिपौ नं लःल्हाःगु खः । समितिं कविकेशरी चित्तधर हृदया किपा तयाः पिथंगु नगुमा मूपाहां डा. कसाः व थाकुलि तुलाधरं पितब्वज्या यानादीगु खः ।

ज्याझ्वलय् मूपाहां कसाः, येँ मनपा १८ वडाअध्यक्ष न्हुछेकाजी महर्जन, समितिया मूछ्याञ्जे पूर्णरत्न तुलाधर, मिसा पुचःया नायः मिनु तुलाधर, समाजया मूछ्याञ्जे राजकुमार कसाः, कसाः तःधं गुथिया छ्याञ्जे उदयरत्न कसाः, तबः समाजया नायः तेजरत्न ताम्राकार, साहित्यकार पूर्णकाजी ताम्रकारं नं थःथःगु नुगःखँ तयादीगु खः ।