ने. सं. ११४४ कौलाथ्व पारू - नःलास्वनेगु

२३ दँ लिपा चिनियाँ राष्ट्रपति

विमानस्थलय् जातीय झाँकी ब्वयाः लसकुस

येँ – २३ दँया ताःहाकःगु अन्तराल लिपा नेपाः झाःम्ह नेपाःया उत्तरी जःलाखःला देय् चीनया राष्ट्रपति सी सिनफिन म्हिगः सनिलय् नेपाः थ्यन । चिनियाँ राष्ट्रपतिया विशेष विमानपाखें झाःम्ह वय्कःयात येँया त्रिभुवन अन्तर्राष्ट्रिय विमानस्थलय् राष्ट्रपति विद्यादेवी भण्डारीं लसकुस यानादीगु खः । विमानस्थलय् वय्कःयात लसकुस यायेत प्रधानमन्त्री केपी शर्मा ओली थः नं झायादीगु खः ।

राष्ट्रपति सी भारतया चेन्नाइपाखें तप्यंक नेपाः झाःगु खः । वय्कः भारतया निन्हुया भ्रमण यायेत म्हिगः भारत थ्यंकादीगु खः । वय्कःयात थुगुसी भारतं राजधानी न्हूदिल्लीइ लसकुस मयासे तामिलनाडु राज्यया चेन्नाइ विमानस्थलय् लसकुस याःगु खःसा भारतीय प्रधानमन्त्री नरेन्द्र मोदीं नं वय्कःयात चेन्नाइलय् हे नापलाःगु खः । राष्ट्रपति सी चेन्नाइनं राजधानी न्हू दिल्ली मवँसे तप्यंक येँय् थ्यंकः झाःगु खः ।

म्हिगः त्रिभुवन अन्तर्राष्ट्रिय विमानस्थलय् वय्कःयात सैनिक बाजं थानाः लसकुस यायेगुया नापनापं विमानस्थल दुने हे नेवाः लगायत नेपाःया थीथी जातीय समुदायया हुलाप्याखं प्रस्तुत यायेगु ज्या नं जूगु खः । भारतय् नं वय्कःयात तामिलनाडुया स्थानीय समुदायया सांस्कृतिक झाँकी प्रस्तुत यासें लसकुस याःगु खः । भारतय् प्रत्यक्ष बाजं थानाः लसकुस याःगु खःसा येँय् स्पीकरं संगीत हायेकाः लसकुस याःगु खः ।

राष्ट्रपति सीयात विमानस्थलय् हे नेपाली सेनापाखें गार्ड अफ अनर प्रदान याःगु खः । वयां लिपा वय्कः सिनामंगल, थापाथली, त्रिपुरेश्वर जुयाः होटल सोल्टी थ्यंकादीगु खः ।वय्कःयात लसकुस यायेगु लागिं लँधुछि हे थीथी कथंया स्वां ह्वयाच्वंगु गमला तयाः समाः यानातःगु खः । होटल सोल्टी दुहां वनेगु दुवातय् तपाःगु एलडी स्क्रिन तयाः नेपाः व चीनया किपा प्रदर्शन यानातःगु खः ।

वय्कः वइगु रुपटय् पूरा हे यातायात बन्द यानातःगु खःसा सर्गतय् हेलिकप्टर समेत चाःहिकाः गस्ती याःगु खः । थौं वय्कः लिहां वनीकुन्हु सार्वजनिक बिदा बियातःगु दुसां सरकारी कर्मचारीतय्त धाःसा हाजिर हे कायेगु कथं लँय् दं वयेत उजं बियातःगु दु ।