ने. सं. ११४६ तछलागा पारू -

लकडाउन छवाः थप यायेत सिफारिस

येँ – स्वनिगः दुने कोरोना संक्रमण अप्वया वनेवं थन लागू याःगु छवाःयंकंया ‘लकडाउन’ या अवधि कन्हय् बुधवाः फुइत्यंगु दु । ‘लकडाउन’ अवधि फुइत्यंगु हे इलय् म्हिगः स्वनिगःया मेयरपिं व सीडीओपिनि दथुइ जूगु मंकाः बैठकं मेगु छवाः नं ‘लकडाउन’ थपे यायेत सरकारयात सिफारिस यायेगु निर्णय याःगु दु ।

छवाः तक याःगु लकडाउनया समिक्षा व थप ज्याझ्वः बारे निर्णय यायेत म्हिगः मंकाः बैठक च्वंगु खः । बैठकय् लकडाउन अवधि दुने जूगु थीथी ज्याखँ बारे ब्रिफिङ यायेगु ज्या जूगु खः । स्वनिगःया मेयरपिंसं कोरोना संक्रमितत तयेगु लागिं क्वारेन्टाइन दयेकेगु लागिं पहल यानाच्वनागु जूगुलिं लकडाउन छवाः ताःहाकः याना बिल धाःसा क्वारेन्टाइनया ज्या पूवंकेत अःपुइगु खँ न्ह्यथंगु खः । स्थानीय तह व स्थानीय प्रशासनं याःगु सिफारिसया आधारय् सरकारं निर्णय याइगु खँ धाःगु दु ।