विश्वन्यंकं संक्रमितत निगू करोडं थहां वन

एजेन्सी – विश्वन्यंकं कोरोना संक्रमिततय् ल्याः निगू करोडं थहां वंगु दु। विश्व स्वास्थ्य संगठन (डब्ल्यूएचओं) सोमवाः बिउगु जानकारी कथं विश्वन्यंकं निगू करोड २६ हजार २११ म्ह कोरोना संक्रमित जूगु दु। कोरोना भाइरस संक्रमणया कारणं विश्वन्यंकं सोमवाः तक ७ लाख ३४ हजार २५ म्ह सीधुंकूगु खँ नं संगठनं धाःगु दु ।

सोमवाः तकया दुने विश्वन्यंकं १ करोड २९लाख ७५७ म्हे कोरोना संक्रमणपाखें मुक्त जूगु दु। विश्वन्यंकं थौंकन्हय् ६३ लाख ९१ हजार ५०५ म्ह सक्रिय संक्रमितत दुसा उमिगु उपचार जुयाच्वंगु दु ।

भारतया पुलांम्ह राष्ट्रपतियात कोरोना
थ्वहे दथुइ भारतय् पुलांम्ह राष्ट्रपति प्रणव मुखर्जीयात नं कोरोना संक्रमण जूगु दु। मुखर्जीं थःम्हं हे ट्विट यासें थःत कोरोना जूगु खँ धाःगु खः । वय्कलं थः मेगु हे ल्वय्या निंतिं अस्पताल वयाबलय् कोरोना परीक्षण याःबलय् रिपोर्ट पोजिटिभ वःगु खँ धयादीगु दु। वय्कलं लिपांगु छवाः दुने थःलिसे सम्पर्कय् वःपिं आइसोलेसेनय् च्वनेत नं इनाप यानादीगु दु। थ्वयां न्ह्यः भारतया गृहमन्त्री अमित शाहयात नं कोरोना संक्रमण जूगु खः ।

भारत थौंकन्हय् कोरोना संक्रमणय् हटस्पट थाय् जुयाच्वंगु दु। भारतय् जक आःतक २२ लाखं मल्याक मनूतय्त संक्रमण खनेदयेधुंकूगु दु। म्हिगः २४ घन्टा दुने जक थन ६२ हजार ६४ म्हेसिके कोरोना खनेदुगु खः । सोमवाः तक भारतय् जक कोरोनां ४४३८६ म्हेसिया ज्यान वनेधुंकूगु दु। सोमवाः २४ घन्टाया दुने जक थन १००७ म्हेसिया ज्यान वंगु खः ।