‘संविधान निर्माता शक्ति छथाय् च्वनेमाः’
येँ (नेपालभाषा टाइम्स)÷ प्रधानमन्त्री लिसें माओवादी केन्द्रया अध्यक्ष पुष्पकमल दाहालं १२ बुँदे समझदारी, विस्तृत शान्ति सम्झौता व संविधान दयेकेगु इलय् छथाय् च्वंगु शक्तित आः हाकनं छथाय् च्वनेमाःगु खँ धयादीगु दु । म्हिगः पोखराय् ग्वसाः ग्वःगु पार्टीया बैठकयात सम्बोधन यासें वय्कलं उगु खँ धयादीगु खः ।
राष्ट्रिय सहमतिपाखें देय्या समस्या ज्यंकेगु नितिं हे राष्ट्रपति व उपराष्ट्रपतिइ राष्ट्रिय सहमति जुइमाः धइगु थःगु चाहनाया अन्तर्य नं थ्वहे जूगु खँ वय्कलं धयादीगु दु ।
राष्ट्रिय सहमतिया नितिं थीथी विकल्प दुगु व तःधंगु पार्टी छथाय् च्वनेफइगु खँ नं वय्कलं धयादिल । वय्कलं निश्चित व्यक्ति मखुसें मंकाः सहमतिया आधारय् न्ह्याः वनेमाःगु खँ नं धयादीगु दु ।
सम्बोधनया झ्वलय् निला तक जनताया दथुइ वनाः रिपोर्ट हयेत निर्देशन बिसें वय्कलं धयादिल, ‘निलाया दुने केन्द्रीय समितिया पूर्ण बैठक च्वनेगु जुइ । उगु इलय् तक जनता व कार्यकर्ताया थाय् वनाः उमिगु खँ न्यने नु, उमिगु सुझाव काये नु, शहीद परिवार, बेपत्ता परिवार, घाइते अपाङ जूपिं पासापिं नापलाये नु, उमिगु सुझावया आधारय् पार्टी पुनर्निर्माण व रुपान्तरण याये नु ।’
उकथं हे वय्कलं समाजवादी मोर्चा दयेकेगु नितिं सहलह जुयाच्वंगु खँ धासें वइगु केन्द्रीय समितिया बैठक तक थःपिं निष्कर्षय् थ्यनीगु खँ नं धयादीगु दु ।
थ्वहे झ्वलय् नेकपा (एकीकृत समाजवादी) या अध्यक्ष माधव नेपालं राष्ट्रपतिइ सहमतिया नितिं प्रधानमन्त्रीं पहल यायेमाःगु खँ धयादीगु दु । म्हिगः प्रधानमन्त्री दाहाललिसे सिंहदरबारय् नापलायेगु झ्वलय् थम्हं उगु सुझाव बियागु खँ धयादीगु खः ।
LEAVE YOUR COMMENTS