जयश्री समाजपाखें दाफा म्ये न्ह्यब्वल
येँ (नेपालभाषा टाइम्स)÷ जयश्री संगीत समाजया ग्वसालय् दाफा व पूर्वीय संगीतया सांगीतिक ज्याझ्वः जूगु दु । ‘हर्मोनी अफ ट्रेडिसन’या नामं वंगु आइतवाः राष्ट्रिय नाचघरय् जूगु ज्याझ्वलय् नीम्ह ल्याय्म्ह कलाकारपिंसं स्वनिगःया नेवाः समुदायं न्ह्याका वयाच्वंगु परम्परागत संगीत न्ह्यब्वःगु खः । ज्याझ्वलय् खिं, ताः, बबू, तबला, नगडा, पछिमा, पोंगा, सितार, बाँसुरी, हार्मोनिम, सारंगीत सहित गणेश ग्वाराया दाफा म्येँ न्ह्यब्वःगु खः ।
अथेहे वरिष्ठ सरोदवादक सुरेश राज वज्राचार्य, सितारवादक विजयलाल श्रेष्ठ व तबलाबादक लक्ष्मीप्रसाद डंगोल व निमेश कपालीपिंसं शास्त्रीय संगीत न्ह्यब्वःगु खः । ज्याझ्वःया अन्त्यय् सकलें कलाकारपिं जानाः फुक्क बाजंया संयोजन यानातःगु वाद्यवृन्द न्ह्यब्वःगु खः । ज्याझ्वलय् येँ महानगरपालिकाया उपमेयर सुनिता डंगोल मूपाहाँ कथं झायादीगु खः ।
ल्याय्म्हतय्त संगीतया महत्वबारे ज्ञान बीगु ताःतयाः न्ह्यानाच्वंगु समाजं थ्वयां न्ह्यः सरोद वादनया विशेष प्रस्तुति दुगु मेस्ट्रो ड्युट्स अन सरोद, सितारवादनया ‘द मूड्स अफ मीड’, भेटानी गायक मधुकर लोहनीया एकल साँझ, विश्वविख्यात भारतीय बाँसुरीबादक पं. श्री हरिप्रसाद चौरासियाया ‘पं. हरिप्रसाद चौरासिया लाइभ इन कन्सर्ट’, भारतया वरिष्ठ नृत्यांगना शिखा खरेया ‘कत्थक रिडम एण्ड एक्सप्रेसन’, जनगायक भृगुराम श्रेष्ठया ८० दँया उमेरय् एकल गायन कार्यक्रम ‘माया रे रत्न’, भारतया नांजाःम्ह बाँसुरीवादक अश्विन श्रीनिवासन व तबलावादक ओजस अढियाया विशेष प्रस्तुत ‘नाड रंग’ ज्याझ्वः यायेधुंकूगु दु ।
LEAVE YOUR COMMENTS