मंसिरं जयनगर–जनकपुर रेल

येँ – जयनगर–जनकपुर रेल मंसिरं निसें सञ्चालनय् वइगु जूगु दु । भारतीय प्रधानमन्त्री नरेन्द्र मोदीया सम्भावित नेपाः भ्रमणया झ्वलय् जयनगरनिसें जनकपुर जुयाः कुर्ता तक दयेके क्वचायेधुंकूगु ३४ किलोमिटर ताःहाकःगु रेल उद्घाटन यायेगु ज्याझ्वः तयातःगु दु ।
रेल विभागया कथं वइगु डिसेम्बर निसें रेल सञ्चालनय् हयेगु तयारी जुयाच्वंगु दु ।

नेपाल व भारतया दथुइ वेट लिजय् रेल सञ्चालन यायेगु सहमति जुइधुंकूगु दु । रेल सञ्चालनया निंतिं भारतीय रेल सेवा निगमं इञ्जिन, चालक व प्राविधिक ग्वाहालि याइगु खँ धाःगु दु । रेल सञ्चालनया निंतिं नेपालय् दक्ष जनशक्ति मदुगुलिं भारतीय जनशक्ति हयाः नेपाः जनशक्ति उत्पादन यायेगु योजना कथं ज्या जुयाच्वंगु दु ।

रेल सञ्चालनया निंतिं नेपाःमित तयारी जुल धाःसा लिपा नेपाःया हे जनशक्ति छ्यलाः रेल सञ्चालन यायेगु तयारी नं रेल विभागं यानाच्वंगु दु । भारत सरकारलिसे जयनगरनिसें बर्दिबास तक ६९ किलोमिटर रेल दयेकेगु सम्झौता जूगु खः ।

उगु सम्झौता कथं ३४ किलोमिटरय् रेल चले यायेगु तयारी लिपांगु चरणय् थ्यनाच्वंगु दु । रेल मार्ग दयेकेत भारतीय सरकारया १० अर्ब तक खर्च जूगु खँ धाःगु दु । जयनगरनिसें कुर्ता तक ३४ किलोमिटर रेल मार्ग दयेकेगु ज्या क्वचायेधुंकूगु दु । रेलय् प्यंगः इन्जिन व उकिं खुगः डब्बा तक साले फइगु खँ धाःगु दु ।

सम्बन्धित बुखँ

LEAVE YOUR COMMENTS