प्रधानन्यायाधीशपाखें पदभार ग्रहण, जोशीयात इजलास मबिइगु

येँ – संसदीय सुनुवाई समितिं प्रधान न्यायाधीशया निंतिं अस्वीकृत याःम्ह दीपकराज जोशीयात नवनियुक्त प्रधानन्यायाधीश चोलेन्द्र शम्शेर जबरां अदालतय् थाय् मबिइगु जूगु दु । थःगु पदभार लःल्हाना कायेधुंकाः पत्रकार सम्मेलनय् न्ववानादिसें प्रधानन्यायाधीश जबरां सर्वोच्चया वरिष्ठ न्यायाधीश दीपकराज जोशीयात इजलास तोके मयायेगु खँ धयादीगु खः ।

पत्रकार सम्मेलनय् वय्कलं धयादीगु दु, ‘संसदीय सुनुवाइ समितिया सम्मान यासें छगू निकास बीत जिं वय्कःयात इनाप याना । थुकिं न्यायालयया निंतिं बांलाइगु जूसा अथे याये माः । जिं आवंलिं वय्कःया इजलाश तोके यायेमखु ।’

संसदीय सुनुवाइ समितिं जोशीयात प्रधानन्यायाधीशय् अस्वीकृत यायेवं वय्कःया थासय् नियुक्त जूम्ह प्रधानन्यायाधीश ओमप्रकाश मिश्रं धाःसा जोशीयात वरिष्ठ न्यायाधीशया हे रुपय् कार्यभार बिया वयाच्वंगु खः । मिश्र प्रधानन्यायाधीशया रुपय् सर्वोच्चय् दुहां वःबलय् नं जोशीं घयपुयाः वय्कःयात स्वागत याःगु खः ।

सर्वोच्चया प्रचलन कथं प्रधानन्यायाधीशं राष्ट्रपति पाखें शपथ कयाः पदभार लःल्हायेत सर्वोच्चय् वइबलय् थथे लसकुस यायेगु चलन दु । अले थथे लसकुस यायेबलय् दकलय् न्ह्यःने वरिष्ठ न्यायाधीश हे च्वनीगु परम्परा दु । तर २८ आंै प्रधानन्यायाधीश जुयादीम्ह जबरा थ्व पालय् सर्वोच्चय् दुहां वःबलय् धाःसा भचा हिउपाः खनेदत । प्यदँया निंतिं प्रधानन्यायाधीश जुयादीम्ह जबरायात लसकुस यायेत सर्वोच्चया वरिष्ठ न्यायाधीश मखसे सर्वोच्चया मू रजिष्ट्रार राजन भट्टराई न्ह्यःने झायादिल । न्यायाधीशतय् चेम्बरय् हे लसकुस याःबलय् नं वरिष्ठ न्यायाधीश दीपकराज जोशी सहभागी मजुल ।

आः प्रधान न्यायाधीश जुयादीम्ह जबरां संसदीय सुनुवाइ जूगु इलय् हे थः प्रधानन्यायाधीश जुल धाःसा जोशीयात इजलास मबिइगु संकेत बियादीगु खः । संसदीय समितिइ सांसदतय्सं तःक्वः हे जोशीं संसदीय समितिया अटेर याःगु धासें न्ह्यसः तःबलय् हे जबरां जोशीयात इजलाश मबिइगु संकेत याःगु खः ।

आइतवाः जूगु संसदीय सुनुवाइया इलय् हे जबरां धयादीगु खः, ‘जि प्रधानन्यायाधीशय् अनुमोदन जुल धाःसा संसदीय समितिया सम्मानय् भचा नं आँच वयेके बीमखु । थुकिया निंतिं जिं समिति समक्ष प्रतिबद्धता प्वंके ।’ मेखे प्रधानन्यायाधीश जबरां इजलाश मबीगु धायेधुंकाः वरिष्ठ न्यायाधीश जोशीयात बिबिसीं प्रतिक्रिया कायेत स्वःबलय् सम्पर्कय् मवःगु खँ धाःगु दु ।