लुँ काण्डया छानबिन यायेत ध्यानाकर्षण

येँ (नेपालभाषा टाइम्स)- प्रतिनिधिसभाया सार्वजनिक लेखा समितिं क्विन्टल लुँ तस्करीयात कयाः उच्चस्तरीय छानविन समिति नीस्वनेत सरकारया ध्यानाकर्षण याःगु दु । समितिया सभापति यानाच्वंम्ह ज्याथम्ह दुजः अर्जुननरसिंह केसीं त्रिभुवन अन्तर्राष्ट्रिय विमानस्थलया भन्सारं पिहां वंगु लुँ तस्करीया छानविन यायेत उच्चस्तरीय समिति नीस्वनेत सरकारया ध्यानाकर्षण याकेगु निर्णय जूगु खँ कनादिल ।

सार्वजनिक लेखा समितिया म्हिगः च्वंगु बैठकय् लुँ तस्करीलिसे राजश्वया विषय स्वानाच्वंगु व उगु विषय समितिया क्षेत्राधिकार लाःगु धासें सरकारया ध्यानाकर्षण याकेगु निर्णय याःगु खः । सभापतित्व यानाच्वंम्ह केसीं संसदय् उगु विषय वयेधुंकूगु व निष्कर्षय् संसद मथ्यंगुलिं ध्यानाकर्षण याकेमाःगु खँ धाःगु दु ।

म्हिगः समितिया बैठकय् न्ववाःपिं सांसदतय्सं उपप्रधानमन्त्री लिसे गृह मन्त्री व अर्थमन्त्री प्रकाशशरण महतयात कयाः हे छानविन यायेमाःगु धासें उच्चस्तरीय छानविन समिति गठन यायेमाःगु माग याःगु खः ।

सहलहया झ्वलय् प्रहरीं गृहमन्त्रीयात छानविन याये फइमखु धासें सरकारय् दुथ्याःगु दलया नेतात छानबिनं सालाकाःगु धासें सरकारं थ्व घटनायात कयाः छानविन यायेमाःगु माग याःगु खः ।

थ्वहे झ्वलय् समितिं थःगु आन्तरिक कार्यविधि पास याःगु दु । समितिं सभापति याकनं ल्ययेगु निंतिं सम्बन्धित पक्षयात ध्यानाकर्षण याकेगु निर्णय नं याःगु दु ।