हिजाखुसिइ यातायाता ताँया उलेज्या

येँ – हिजाखुसिइ दयेकूगु यातायाता ताँ उलेज्या जूगु दु । हाकुताँ व ह्याउँताँया दथुइ दयेकूगु उगु यातायात ताँ वंगु शनिवाः खिजाखुसी सुचुकुचु यायेगु अभियान २७६ औं हप्ता थ्यंगु लसताय् लाकाः उलेज्या याःगु खः । रुद्रमति व धोवीखोला नं धाइगु खुसिइ दयेकूगु ताँ प्रदेश नं. ३ सरकारया २७ गू लाख नीच्याद्वः आर्थिक ग्वाहालिइ दयेकूगु खः ।

वंगु शनिवाः खुसि सुचुकुचु यायेगु अभियानया झ्वलय् संघीय संसदया सांसद गगन थापा व येँ महानगरपालिका वडा नं. ३०या वडाअध्यक्ष दलबहादुर कार्कीं ताँया छगू ब्व व प्रदेशसभा सदस्य नरोत्तम वैद्य व येँ महानगरपालिका वडा नं. ७या वडाअध्यक्ष शुद्धकुमार डंगोलं मेगु ब्वपाखें मंकाःकथं उलेज्या यानादीगु खः ।

उगु थासय् ताँ मदुगुलिं अनं वये वने यायेमाःपिं हाकुताँतक वनाः चाःहिला वयेत बाध्य जुयाच्वंगु खःसा ताँ निर्माण लिपा लँजुवाःतय्त सहज जुया बिउगु दु । ज्याझ्वलय् नवासें सांसद थापां थःगु क्षेत्रय् ध्याच जुयाच्वंगु व धूफ्वः दनाच्वंगु सतक दयेकेगु जक मखसे ताँ दयेकेगु ज्या नं जुयाच्वंगु धासें विकास निर्माणया ज्याय् संकुचित सोच मखु, चकंगु सोच ज्वनाः न्ह्याः वनेमाः धयादिल ।

प्रदेश सांसद वैद्यं ताँ दयेकेत थम्हं वडाअध्यक्षतलिसे सहलह यानाः प्रदेश सरकार समक्ष बाघौया दुने प्रस्ताव तयाः ताँ दयेकेगु योजना बियागु जानकारी बियादिल । ३ नं. प्रदेशसभा सदस्य राधा घले, वडाअध्यक्षद्वय कार्की व डंगोलं नं नवानादीगु ज्याझ्वलय् येँ मनपा ९ वडाअध्यक्ष रामकृष्ण श्रेष्ठया नं उपस्थिति दुगु खः ।