शताब्दी पुरुष जोशीया लुमन्ति मुँज्या

यल(नेपालभाषा टाइम्स)- वाङ्मय शताब्दी पुरुष सत्यमोहन जोशी लुमन्तिइ विचाः मुँज्या ज्याझ्वः जुल । नेपालभाषा मंकाः खलः यलया ग्वसालय् शताब्दी पुरुष जोशीया झिंस्वन्हुया तिथि लाकाः मंगलबजारय् उगु लमुन्ति मुँज्या याःगु खः ।

ज्याझ्वलय् प्रधानमन्त्री शेरबहादुर देउवां शताब्दी पुरुष जोशी देय्या भाषा, कला, संस्कृति व लोक साहित्य ख्यःया छगः महत्वपूर्ण निधि जूगु विचाः तयादिल । प्रम देउवां शोक मन्तव्य तयेगु झ्वलय् शताब्दी पुरुष जोशी सरल जीवन यापनया पर्याय खः धासें वय्कलं नेपाः व चीनया दथुइ सांस्कृतिक सम्बन्ध स्थापित यायेत नं महत्वपूर्ण भूमिका म्हितादीगु विचाः प्वंकादिल ।

संस्कृति, पर्यटन व नागरिक उड्डयन मन्त्री जीवनराम श्रेष्ठं वाङ्मय शताब्दी पुरुष जोशी थेंज्याःम्ह बहुआयामिक व्यक्तित्व संसारय् म्हो जक जन्म जुइ धासें बहुगुण सम्पन्न व्यक्तित्व वय्कलं भाषा, कला, साहित्य, संस्कृतिया क्षेत्रय् बियादीगु योगदान अतुलनीय व अविष्मरणीय जूगु विचाः तयादिल ।

यल महानगरपालिका प्रमुख चिरिबाबु महर्जनं शताब्दी पुरुष जोशी ९८ दँ क्यंगु इलय् यल महानगरपालिकापाखें निर्णय यानाः वय्कःयात सवारी साधन, सुरक्षा गार्ड व मोबाइल फोनया सेवा बियागु खँ कनादिसें वय्कः जीवित जुयाच्वंगु इलय् याये खंगु सेवां थःपिं अतिकं लय्ताःगु खँ कनादिल ।

जोशीया काय अणुराज जोशीं थः अबु जीवित हे जुयाच्वंगु इलय् राज्यपाखें सम्मानकथं स्वताजिकथंया मुद्रा व हुलाक टिकट प्रकाशन यानाः अति विशिष्टकथंया सम्मान याःगु खँ कनादिसें वय्कः मदयेधुंकाः नं राज्यपाखें सम्मान यानाः सार्वजनिक विदा बिउगुलिं राज्यप्रति कृतज्ञता प्वंकाच्वना धयादिल ।

मंकाः खलः यलया नायः हिराकाजी महर्जनं जोशीया राष्ट्रियस्तरया व्यक्तित्वयात अजर अमर याना तयेत सत्यमोहन जोशी भाषा, साहित्य पुरस्कार स्थापना यानागु व उकिया निंतिं ५१ द्वः तका दांया अक्षय कोष नं स्वनागु जानकारी बियादिल ।