एमालेयात गठबन्धनया चिउताः

येँ (नेपालभाषा टाइम्स)- नेपाली कांग्रेसं प्रधानमन्त्री हे जुइत याःगु आग्रहयात समेत त्याग यानाः माओवादी केन्द्रलिसे सत्ता साझेदार याःवंम्ह एमाले आः थ्वहे गठबन्धनयात बल्लाकेत सक्रिय जूगु दु । नकतिनि क्वचाःगु एमाले सचिवालय बैठकं गठबन्धनयात बल्लाकेगु लागिं चीधंगु दलतय्त नं सरकारय् समावेश जुइत इनाप याःगु दु ।

एमाले अध्यक्ष केपी शर्मा ओलीं माओवादी अध्यक्ष पुष्पकमल दाहाल नेतृत्वया थ्व सरकारयात अप्वः नागःतुगः यायेमते धकाः नं पार्टीया नेता कार्यकर्तातय्त निर्देशन बियादीगु दु । प्रधानमन्त्री दाहालं कांग्रेसयात त्वःताः आकाझाकां एमालेया साथ कयाः न्हूगु गठबन्धन दयेकेवं एमाले हे छुं नेतातय्सं प्रचण्डयात ‘द्वैध चरित्र’ दुम्ह नेता धकाः आलोचना याना हःगु खः । लिसें प्रचण्डयात अप्वः पत्याः याये मजिउ, लिपा एमालेयात नं धोका बीफु धकाः नं सामाजिक सञ्जालय् च्वयेगु याना हःगु खः । एमाले अध्यक्ष ओलीं थ्व गठबन्धन थःपिनिगु हे पहलय् दयेकागु दावी यासें अज्याःगु आलोचना याये मते धकाः नं निर्देशन बियादीगु दु ।

प्रधानमन्त्री दाहालं कांग्रेसयात त्वःताः एमालेया साथ कायेवं माओवादीयात पाठ स्यनेगु धकाः कांग्रेस सभापति शेरबहादुर देउवां मेगु गठबन्धन दयेकेगु कुतः यानादीगु खः । उकिया लागिं वय्कलं रास्वपा, नेकपा (एस), जसपा, नाउपा, राप्रपा आदि पार्टीया नेतातलिसे समेत संवाद न्ह्याकूगु खः । कांग्रेसया उगु कुतःयात निस्तेज यायेगु लागिं एमालें विशेष भूमिका म्हितूगु खः । उकिया लागिं एमाले अध्यक्ष ओली पुलांगु तं फुक्क ल्वःमंकाः माधव नेपालया छेँय् समेत झाःगु खः ।

मेखे एमाले व माओवादीया न्हूगु गठबन्धन निर्माण जूगुलिं माओवादी त्वःताः एमालेय् वंम्ह उपाध्यक्ष रामबहादुर थापा बादल धाःसा लय्ताःगु दु । म्हिगः गुल्मीइ जूगु पत्रकार सम्मेलनय् न्ववासें एमाले व माओवादी छथाय् च्वंगुलिं नेपाःया कम्युनिष्ट शक्ति बल्लाना वनीगु सम्भावना थम्हं खंकागु दु धकाः वय्कलं धयादीगु खः । माओवादीया शक्तिशाली नेता जुयाच्वंम्ह रामबहादुर थापा एमालेय् वनेधुंकाः उपाध्यक्ष थेंज्याःगु वरिष्ठ पदय् च्वनादीसां पार्टीया शक्ति सन्तुलनय् धाःसा वय्कःया खास भूमिका खने मदु ।

थ्वहे झ्वलय् एमाले–माओवादी गठबन्धनया न्हापांगु लिच्वः कथं आः फागुन २९ गते जुइगु राष्ट्रियसभाया अध्यक्ष पदया चुनावय् एमालें माओवादीया उम्मेदवारयात समर्थन याइगु जूगु दु । अथे हे उपाध्यक्षया पदय् एमाले उम्मेदवारयात माओवादीं समर्थन याइगु जूगु दु । राष्ट्रियसभाया अध्यक्ष पदय् सुयात उम्मेदवार दयेकेगु धकाः माओवादीं निर्णय धाःसा याःगु मदुनि ।

मेखे वैशाखं जुइगु उपनिर्वाचनय् इलामय् माओवादीं एमालेया उम्मेदवार सुहाङ नेम्बाङयात समर्थन याइगु सम्भावना दुगु खँ धाःगु दु । सुहाङ एमालेया दिवंगत नेता सुभाष नेम्बाङया काय खः ।