ने. सं. ११४३ चौलाथ्व तृतीया -

सर्वोच्चय् प्रधान–सुनार मुद्दाया वहस

येँ -क्वथा बालं मबिउ धासें तनहुँया रुपा सुनारं सर्वोच्च अदालतय् येँया सरस्वती प्रधान विरुद्ध सर्वोच्च अदालतय् दायर रिटयात कयाः वहस न्ह्यानाच्वंगु दु ।
सुनारया पक्षं जुयाच्वंगु वहस म्हिगः बुधवाः क्वचाःगु खःसा म्हिगःनिसें प्रधानया पक्षं वहस शुरु जूगु खः । प्रधानया पक्षं अधिवक्तापिं राज सुवाल, जुजुकाजी रंजितं म्हिगः यानादीगु खः । थ्व वहस थौं नं जारी जुइ तिनि । थौं प्रधानया पक्षं मेपिं च्याम्ह वकिलतय्सं वहस याइगु खँ धाःगु दु ।
प्रधानया पक्षय् वहस यानादीपिं वकिलतय्त इजलासय्

च्वनादीम्ह न्यायाधीश प्रकाशचन्द्र राउतं आपालं न्ह्यसःत तयादीगु खःसां वकिलतय्सं फुक्कं न्ह्यसःया पूवंक लिसः बियादीगु खः ।

निवेदक सुनारया पक्षं नं १२ म्ह वकिलतय्सं वहस यानादीगु खः । सर्वोच्च अदालतय् दुने वहस जुयाच्वंगु इलय् नं पिने फिब्व ख्यलय् धाःसा दलित अभियन्तातय्सं ब्यानर ब्वयाः प्रदर्शन यानाच्वंगु खः ।

प्रधानया पक्षय् नं नेवाः अभियन्तात सक्रिय जुयाच्वंसां खने दयेक प्रदर्शन धाःसा याये मफयाच्वंगु खँ अभियन्तातय्सं धाःगु दु । वय्कःपिंसं थज्याःगु इलय् थःपिनि एकता प्रदर्शन जुइ कथं नेवाःतय्सं नं पहल याये माःगु खँय् नं बः बियादीगु दु ।

थौं प्रधानया पक्षं वहस याइपिं वकिलतय्त म्हतिं १० मिनेट जक न्ववायेत इजलासपाखें ई बिउगु दु । प्रधानया पक्षं वहस क्वचाल कि सुनार पक्षया वकिलतय्त प्रत्युत्तर वहस याकाः वयां लिपा फैसला बी फइगु खँ धाःगु दु ।