स्वन्हुयंकंया राष्ट्रिय जलवायु सम्मेलन जुइगु

येँ – जिल्ला समन्वय समिति महासंघया ग्वसालय् स्वन्हुयंकंया राष्ट्रिय जलवायु सम्मेलन जुइगु जूगु दु । महासंघया ग्वसालय् थ्व हे वइगु पुस १५, १६ व १७ गते स्वन्हुयंकं जुइगु उगु सम्मेलन सिन्धुपाल्चोकया चौतारास्थित मेलम्चीइ जुइ । जिल्ला समन्वय समिति चौतारा, सिन्धुपाल्चोकया व्यवस्थापनय् मेलम्ची लागाय् जुइगु सम्मेलनया उलेज्या राष्ट्रपति विद्यादेवी भण्डारीं यानादी ।

सम्मेलन पुस १५ गते जुइगु खःसां सम्मेलनया औपचारिक उलेज्या धाःसा पुस १६ गते जुइगु जानकारी थन छगू पत्रकार सम्मेलन यासें बिउगु खः ।पत्रकार सम्मेलनय् नवासें नेकपाया नेता लिसें प्रतिनिधिसभा सदस्य अग्नि सापकोटां जलवायु प्रदूषणय् थीथीकथंया लिच्वः लाकाच्वंपिंत सजाँय बीमाः धयादिसें सजाय स्वरुप इमिगुपाखें क्षतिपूर्ति कायम यायेगु निंतिं नं थुगु सम्मेलनया ग्वसाः ग्वयेत्यनागु खः धयादिल ।

स्वन्हुयंकंया उगु सम्मेलनय् थीथी झिंछगू ज्यापौ न्ह्यब्वयेगु नं पत्रकार सम्मेलनय् जानकारी बिउगु खः । कृषि, पर्यटन, वनस्पति लागाय् जलवायु परिवर्तनं लाकाच्वंगु लिच्वःया बारे विज्ञपिं डा. सुदिप ठकुरी, प्रो. केदार धिताल, प्रो. टिके झा, रमेशकुमार मास्के, ऋषिराम शर्मा, मदनलाल श्रेष्ठ, रिजनभक्त कायस्थ लगायतं ज्यापौ न्ह्यब्वयादी ।

पत्रकार सम्मेलनय् महासंघया अध्यक्ष सीताकुमारी सन्दास व जिल्ला विकास समन्वय समिति ख्वपया संयोजक नवराज गेलालं सम्मेलनया थीथी पक्षयात कयाः नुगःखँ तयादीगु खः ।