किपुली बुंगद्यःया स्वां तः मवनीगु
येँ (नेपालभाषा टाइम्स)÷अन्ततः बुंगद्यःया पानेजुपिंसं थुगुसी किपुली बुंगद्यःया प्रसाद बिउ वनेगु ज्या बन्द यायेगु निर्णय याःगु दु । बुंगद्यःया पानेजुपिनि संगठन ‘श्री ह्यगृव भैरवनाथ तथा ३२ पानेजु संघ’ पाखें म्हिगः किपुली उगु प्रसाद बिउ वनीम्ह जलः पानेजु सुरोजन शाक्ययात पौ छ्वसें थुगुुसी किपुली प्रसाद बिउ वनेगु ज्या याये मते धकाः निर्देशन बिउगु खः ।
किपूया गःछेँस्थित प्यंगः थामय् बुंगद्यः व याकः मिसाया प्रतिमूर्ति दयेकाः पलिस्था याःगु खँय् तम्वःपिं पानेजुपिंसं उगु मूर्ति चीका छ्वयेत इनाप याःगु खः । तर किपूया सुखी गःछेँ समाजं मूर्ति चीके फइ मखु धकाः अडान कया वयाच्वंगु खः । पानेजुपिंसं प्यंगः थामय् तयातःगु उगु मूर्ति चीका मछ्वःतले किपुली स्वां बिउ वनेगु जुइ मखु धकाः वंगु पुस महिनाय् हे निर्णय याःगु खः । तर निर्णय लिपा नं किपुली बुंगद्यःया प्रतिमूर्ति लिकायेगु ज्या मजूगु कारणं आः स्वां तः वनेगु मखु धकाः निर्णय याःगु खः ।
दँय्दसं बुंगद्यः जात्राया झ्वलय् बुंगद्यःयात थति त्वालं जावलाख्यलयय् साली कुन्हु बुंगद्यःया प्रतिनिधि पात्र जुयाः जल पानेजु थति त्वालंनिसें किपुली तक लाकां मन्ह्यासे न्यासि हे वनाः बुंगद्यःया प्रसाद बीगु चलन दु । किपुली उगु स्वां प्रसाद प्यंगः थामय् च्वनीम्ह छम्ह ब्याहा मजूनिम्ह मिसां लःल्हाना काइगु खः । थौंकन्हय् उगु स्वां स्थानीय लक्ष्मी महर्जनं लःल्हानाः कायेगु यानाच्वंगु दु । थ्व परम्परा वंगु १६७९ दँ निसें न्ह्याना वयाच्वंगु दु धइगु धापू दु ।
वंगु मंसिर महिनाय् किपूया वहे थासय् बुंगद्यः व याकः मिसाया मूर्ति दयेकाः पलिस्था याःगु खः । येँ मनपाया आर्थिक ग्वाहालि कयाः यलय् दयेकूगु उगु मूर्ति बाजागाजा सहित तयाः जात्रा यासें किपूया प्यंगः थामय् पलिस्था याःगु खः ।
तर बुंगद्यः मदु धकाः कल्पना यानातःगु थासय् बुंगद्यःया मूर्ति तयेगु व जीवित हे दनिम्ह याकः मिसायात नं मूर्ति दयेकाः पलिस्था यायेगु पाय्छि जूगु ज्या मखु धासें पानेजु संघं विरोध प्रकट यायेवं थ्व विवाद सार्वजनिक जूगु खः ।
विवाद तच्वया वनेधुंकाः पुरातत्व विभागं नं मूर्ति लिकाये माली धकाः निर्णय यासें माःथाय् पौ छ्वयेधुंकूगु दु । अथे हे यल महानगरपालिका व किपू नगरपालिकां नं मूर्ति चीका छ्वयेगु धकाः निर्णय यायेधुंकूगु दु । तर किपुली उगु मूर्ति पलिस्था यायेगु लागिं पहल याःगु सुखी गःछेँ समाजं धाःसा पलिस्था यायेधुंकुगु मूर्ति लिकायेगु जुइ मखु धासें थुकिया बारे पानेजुपिंलिसे द्विपक्षीय वार्ता यायेगु प्रस्ताव न्ह्यःने तःगु दु । तर अज्याःगु वार्ता धाःसा जुइ मफयाच्वंगु खः ।
थ्वहे झ्वलय् म्हिगः ३२ पानेजु संघं जल पानेजु शाक्ययात पौ च्वसें संघपाखें मेगु निर्णय मयाःतले सुयां नं दबाब, करकाप व परिबन्दय् लाःगु त्वहःचिनाः प्रसाद यंकेगु ज्या याये मते धकाः उजं बिउगु खः ।
LEAVE YOUR COMMENTS