ज्याथम्ह सांसद ल्ययेत अलमल, नेवाः भासं छम्ह जक सांसदपाखें शपथ ग्रहण

येँ – प्रतिनिधि सभा व राष्ट्रिय सभाया सांसदतय्त म्हिगः जूगु शपथ ग्रहण याकेगु ज्याझ्वलय् आपालं सांसदत थःथःपिनि पहिचान पिलुइगु वसः पुनाः वःगु खने दत । ज्याझ्वलय् आपालं सांसदतय्सं थःथःपिनि मांभासं हे शपथ ग्रहण याःगु खः । उकी मध्ये नेपालभाषां शपथ ग्रहण यानादीम्ह धाःसा ससफोया सांसद राजेन्द्र श्रेष्ठ छम्ह हे जक जुयादिल । मेगु पार्टीया नेवाः सांसदतय्सं मांभासं शपथ ग्रहण मयाः ।

प्रतिनिधिसभाया सांसदतय्त दकलय् ज्याथम्ह सांसदया ल्याखं राजपा अध्यक्ष मण्डलया दुजः महन्थ ठाकुरं सभामुख कथं शपथ ग्रहण याकादीगु खः ।

प्रतिनिधिसभाया ज्याथम्ह सांसद ठाकुर खःसां नागरिकता कथं उगु हे पार्टीया मेम्ह सांसद महेन्द्र यादव दकलय् ज्याथम्ह दुजः खने दयाच्वंगु खः । वय्कःया धाथेंया उमेर ६३ दँ खःसां नागरिकताय् धाःसा ८० दँ जुयाच्वंगु खः । उकिं थौं वय्कःयात ‘विरामी बिदा’ कायेकाः शपथ ग्रहणया ज्या महन्थ ठाकुरयात हे याके बिउगु खः ।

म्हिगः सुथय् वय्कःपिनि आन्तरिक बैठक च्वनाः थ्व समस्या समाधान याःगु खः । महेन्द्र यादवं कनादी कथं न्हापा नागरिकता कयाबलय् वय्कलं थःगु जन्ममिति द्वनाच्वन धकाः अधिकृतयात धयागु खःसां मधेसी धकाः हेपे यानाः सच्चे याना मबिउगु जुयाच्वन ।