सक्व मेलाय् छगू करोड आर्थिक संकलन

सक्व(नेपालभाषा टाइम्स)- लछि न्ह्यःनिसें न्ह्यानाच्वंगु थनया धार्मिक महत्वया श्री माधवनारायणया व्रत शालीनदी मेला क्वचाःगु दु । मिलापुन्हिनिसें न्ह्याःगु मेला वंगु आइतवाः सिपुन्हिकुन्हु क्वचाःगु खः ।
अश्वमेघ यज्ञलिसें लछि न्ह्यवंनिसें न्ह्यानाच्वंगु श्री माधवनारायण व्रत व शालीनदी मेला क्वचाःगु खः । मेला अवधिइ थीथी थासं वःपिं भक्तजनपाखें छगू करोडं मल्याक चन्दा संकलन जूगु दु ।

श्री माधवनारायण स्वस्थानी व्रत तथा शालीनदी मेला सुधार समितिया अध्यक्ष बालकृष्ण श्रेष्ठयाकथं वंगु पुस २२ गतेनिसें माघ २२तक मेलाज्वःछि लछिया अवधि दुने मेलाय् छगू करोड निगू लख पीप्यद्वः ग्वाहालि संकलन जूगु जानकारी बियादीगु दु ।

थगुने कोरोनाया कारणं म्हो जक भक्तजन वःगुलिं आर्थिक संकलन नं म्हो जूगु व थुगुसी भक्तजनलिसें आर्थिक संकलन नं अप्वः जूगु समितिं जानकारी बिउगु दु । मेलाय् भक्तजनपाखें संकलन जूगु चन्दा व मेला अवधिइ संचालन याःगु पसःया बाःपाखें म्हःगु ध्यबा श्री माधवनारायणया देगः निर्माणय् खर्च याइगु जूगु दु ।

थुगुसी सक्व मेलाय् स्वीगू लख स्वयां अप्वः भक्तजन वःगु समितिं जानकारी बिउगु दु ।