शालीनया मृत्युइ होहल्लाया लिच्वः
येँ (नेपालभाषा टाइम्स)÷चितवनया छगू होस्टलय् च्वनाः आखः ब्वनीम्ह १४ दँया मय्जु शालीन पोखरेल यगानाः सिनाच्वंगु घटनायात कयाः वादविवाद शुरु जूगु दु । मदुम्ह शालीनया अबुं थ्व घटना आत्महत्या मखु, बलात्कार लिपा हत्या खः धकाः सामाजिक सञ्जालय् हल्ला यायेवं प्रहरीं एकता शिशु निकेतनया प्रधानाध्यापक लगायत स्वम्हेसित ज्वंगु दु ।
थ्वहे झ्वलय् टिचिङ अस्पतालय् जूगु पोष्ट मार्टम रिपोर्टय् शालीनया हत्या वा बलात्कार जूगु मखुसें आत्महत्या हे खः धकाः रिपोर्ट बिउगु दु । उगु रिपोर्ट थःपिंत मबिउ धकाः शालीनया अबुपिंसं म्हिगः येँय् प्रदर्शन नं याःगु खः । प्रहरीं उकी ब्वति काःपिं सामाजिक अभियन्ता धाःपिं पूण्य गौतम व युवराज सफलयात ज्वना यंकूगु दु ।
अथे खःसां प्रहरीं धाःसा थ्व घटनाया गम्भीर छानबिन यायेगु खँ धाःगु दु । थ्व छानबिनय् स्कुलया शिक्षक, विद्यार्थी जक मखु शालीनया मांबौयात तकं साले मालीगु खँ धाःगु दु । छाय्धाःसां सालीनया मां व बौ थनिं झिदँ न्ह्यःहे पारपाचुकाः अलग अलग च्वनेधुंकूपिं खः । दुबइलय् च्वनीम्ह मां व दक्षिण अफ्रिकाय् च्वनीम्ह बौम्ह निम्हेस्यां नं मेपिं इहिपा यायेधुंकूगु दुसा याकःम्ह्याय् शालीनयात धाःसा होस्टलय् तयातःगु खः । आः प्रहरीं मांबौया थ्व अवस्थायात समेत कयाः छानबिन याइगु खँ धाःगु दु ।
LEAVE YOUR COMMENTS