छाँयादेवीया मजदूरपाखें अभियन्तायात ख्याच्वः

येँ (नेपालभाषा टाइम्स) – थँबहीया छायाँदेवी कम्प्लेक्स विरुद्ध गलत प्रचार याःगु धासें सम्पदा अभियन्ता भागवत नरसिंह प्रधानयात अन ज्या याइपिं मजदुरतय्सं ख्याच्वः बिउगु दु । नेपाल स्वतन्त्र होटल, क्यासिनो तथा रेष्टुरेन्ट मजदुर युनियनया अध्यक्ष सूर्यबहादुर कुँवर व युनिट्राभ केन्द्रीय कमिटीया अध्यक्ष सुमन पराजुलीं हस्ताक्षर यानातःगु छगू मंकाः पौ हे बिसें ‘स्वन्हुया दुने सम्मानित अदालतया निर्णय प्रति निष्ठायुक्त प्रतिबद्धता प्वंकाः उकिया जानकारी मजदूर युनियनयात बिउ’ धाःगु दु । यदि अथे मयात धाःसा वय्कः विरुद्ध थःपिं कुहां वये माली धकाः नं उकी ख्याच्वः बियातःगु दु ।

अभियन्ता प्रधानं थःत मजदुरया नामय् छेँय् हे वयाः ख्याच्वः बिउ वःगु खँ ‘नेपालभाषा टाइम्स’ यात कनादीगु दु । मजदुरतय् उगु ख्याच्वलं थः त्रसित जूगु धासें वय्कलं सर्वोच्च अदालतया निर्णय अःखः वयाच्वंगु थज्याःगु ख्याच्वः बीगु ज्या बन्द यायेत नं इनाप यानादीगु दु ।