अख्तियारयात सतक पीडितया ज्ञापनपौ
येँ – सडक विस्तार पीडित संघर्ष समितिं कन्हय् अख्तियार दुरुपयोग अनुसन्धान आयोगयात ज्ञापन पौ बीगु ज्याझ्वः प्राविधिक कारणं स्थगित जूगु दुु । काठमाडौं उपत्यका विकास प्राधिकरण आयुक्त व तत्कालिन सडक डिभिजन प्रमुखया विरुद्ध अख्तियारय् दुगु मुद्दा न्ह्याकेमाःगु माग यासें उगु ज्ञापन पौ बीत्यंगु खः ।
अख्तियारयात ज्ञापन पौ बीगु ज्याझ्वः आः वइगु १६ गते जुइगु खँ सतक विस्तार पीडित संघर्ष समितिया नायः सुमन साय्मिं ‘नेपालभाषा टाइम्स’ यात कनादीगु दु । उपत्यका विकास प्राधिकरणया आयुक्त भाइकाजी तिवारी विरुद्ध अख्तियारय् नीन्हय्गू मुद्दा लानाच्वंगु दु । उगु मुद्दायात तामेलीइ तयातःगुलिं मुद्दा न्ह्याकेत दबाब बीकथं ज्ञापन पौ बीत्यनागु खँ नं वय्कलं कनादीगु दु ।
न्हापा न्हापां अख्तियारय् थीथी व्यक्तिपिंसं उगु तामेली लानाच्वंगु मुद्दा न्ह्याकेमाः धकाः आपालं निवेदन बीधुंकूगु खँ कनादिसें अध्यक्ष साय्मिं तर आः सतक पीडित जनता जानाः मंकाः कथं हे ज्ञापन पौ बीत्यंगु खँ कनादीगु दु । लिसें सतक पीडित संघर्ष समितिं याकनं हे येँया हनुमानध्वाखाय् फोटो प्रदर्शनी यायेत तयारी यानाच्वंगु जानकारी नं वय्कलं बियादिल ।
फोटो प्रदर्शनीया झ्वलय् स्वनिगःया ऐतिहासिक व सांस्कृतिक महत्वं जाःगु फोटो प्रदर्शनी जुइगु खँ कनादिल । वइगु १६ गते ज्ञापन पौ बीगु ज्याझ्वलय् ब्वति कायेत वय्कलं पीडित स्थानीय जनताया लिसें सकलसितं इनाप यानादीगु दु । ज्ञापन पौ बीत १६ गते १० बजे नक्सालया नारायणचौरय् मुनेगु खँ धाःगु दु ।
LEAVE YOUR COMMENTS