तनाच्वंगु बौद्ध सम्पदा मालेत उजुरी

येँ-  विश्व सम्पदाया धलखय् लाःगु पशुपति लागाय् च्वंगु बौद्ध सम्पदा तंगुयात मालेत धासें स्थानीय व अभियन्तातय्सं सरोकार क्यंगु दु । पशुपतिइ च्वंगु लिच्छवीकालीन बौद्ध सम्पदा तंगु ताःई दयेधुंकूसां उकियात मालेगु खँय् बेवास्ता याःगु धासें स्थानीयत आक्रोशित जूगु दु ।

पशुपतिइ च्वंगु लिच्छवीकालीन बौद्ध सम्पदा धम्मचक्र तंगु झण्डै लछि दयेत्यंगु दुसा आतक नं उकियात मालेत पशुपति क्षेत्र विकास कोषं बेवास्ता याःगु धासें सरोकारवालातय्सं चिउताः क्यंगु दु । वंगु विहीवाः कोषय् जूगु सहलहया इलय् स्थानीयलिसें अभियन्तातय्सं पशुपति लागां तंगु पुरातात्विक व ऐतिहासिक महत्वया बौद्ध सम्पदा धम्मचक्र मालेत पहल यायेत इनाप याःगु दु ।

उगु इलय् कोषया कार्यकारी निर्देशक घनश्याम खतिवडां तनाच्वंगु बौद्ध सम्पदा धम्मचक्र मालेगु ज्या जुयाच्वंगु व थ्व झ्वलय् सुनां यंकूगु धइगु नं पहिचान जुइधुंकूगु दावी यानादीगु दु ।

थ्व हे झ्वलय् बागमति प्रदेशया सांसद नरोत्तम वैद्यं तनाच्वंगु निद्वः दँ स्वयां पुलांगु लिच्छवीकालीन बौद्ध सम्पदा धम्मचक्र याकनं मालेत व दोषीयात कानूनी दायराय् हयेत धासें महानगरीय प्रहरी वृत्त गौशालाय् उजुरी बियादीगु दु । अथे हे अभियन्तातय्सं विश्व सम्पदाया धलखय् दुथ्यानाच्वंगु पशुपतिइ पुरातात्विक मान्यता अःखः भौतिक संरचना निर्माण यायेगु, आधुनिक निर्माण सामग्री प्रयोग मयायेत, गैरकानूनी रुपं निर्माण जुयाच्वंगुयात वनेत लगायत झिंन्यागू बुँदाया माग कोषयात लःल्हाःगु दु ।

सम्बन्धित बुखँ

LEAVE YOUR COMMENTS