देवदास मानन्धरया लुमंतिइ अनलाइन बिचाः मुँज्या

येँ (नेपालभाषा टाइम्स)- नेपालभाषा सेवीमदुम्ह देवदास मानन्धरया लुमंतिइ म्हीग अनलाइन प्रविधिपाखें बिचाः मुँज्या जुल । ज्याझ्वलय् नेपाःया थीथी थाय् लिसें अमेरिका व बेलायतय् च्वनादीपिंसं नं ब्वतिकयादीगु खः । लक्ष्मीदास मानन्धर लुमन्ति पुचः व अमेरिकाया श्रष्टा साँभ mनांगु संस्थाया मंकाः ग्वसालय् जूगु उगु ज्याझ्वलय् भाजु मानन्धरयात कयाः तयार यानातःगु श्रव्यदृश्य सामग्री नं न्ह्यब्वयेगु ज्या जूगु खः ।
ज्याझ्वलय् थःगु बिचाः तयादिसें जनकवि दुर्गालाल श्रेष्ठं नेपाल संवत्यात जनताया दथुइ यंकेगु ज्याय् देवदास मानन्धरं यानादीगु कुतः न्ह्यथनेबहः जू धयादिल । डा. त्रिरत्न मानन्धरं नेपाल संवत्यात सर्वसाधारण मनूतय्सं थुइगु भासं तिथिया नापनापं न्हिल्याः समेत दथ्याकाः न्हूगु क्यालेण्डर पिथनेगु ज्याय् देवदास मानन्धरं विशेष योगदान यानादीगु दु धयादिल ।

नेवाः न्ह्यलुवा मल्ल के. सुन्दरं देवदास मानन्धर आईटीया विज्ञ जूगुलिं नेपालभाषाया थीथी ख्यलय् नं आईजी माध्यमयात प्रयोग यानादीगु खँ कँसें तर न्ह्यागु ज्या याःसां मेपिंत न्ह्यःने तयाः थः लिउने च्वनेगु वय्कःया बानी दुगु खँ कनादिल । वल्र्ड नेवाः अर्गनाइजेशन (डब्लुएनओ) या नायः संयुक्त श्रेष्ठं देवदास मानन्धरयात थम्हं छम्ह ‘टेक्निकल माइण्डेड’ मनूया रुपय् म्हसीकागु धासें न्ह्यागु विषययात नं स्वयेगु वय्कःया प्राविधिक दृष्टिकोण दुगु खँ कनादिल ।

भिक्षु कोण्डन्यं देवदास मानन्धर छम्ह बहुआयामि कव्यक्तित्व खः धासें बौद्ध शिक्षाया प्रचार प्रसार यायेगु ज्याय् वय्कलं प्राविधिक ख्यलं यानादीगु योगदानया चर्चा यानाबिज्यात । पुलांम्हमन्त्री जीवनराम श्रेष्ठ देवदास मानन्धरया अबु लक्ष्मीदास मानन्धरलिसे थःगु राजनीतिक स्वापू दुगु खँ कँसें वय्कःपिनि परिवार हे समाज, भाषा, कला संस्कृतिया सेवाय् लगे जुयाच्वंगु दु धयादिल ।

श्रष्टा साँझ अमेरिकाया संयोजक प्रभात दीक्षितं केमिकल इन्जिनीयरिङ ब्वनादीम्ह देवदास मानन्धरयाके नेपालय् पूरा दक्षिण एशियायात हे नकेत गाक्क आलु उत्पादन याये फइ धइगु विश्वास दु धासें कनादिल, ‘थज्याःगु क्षमता दुगु नेपालं दँय् न्यागू अर्ब तकाया आलु विदेशं आयात यानाच्वन धाःगु खँ न्यनाः वय्कः तसकं निराश जुयादीगु खः ।’ देवदासं थःत विथोवेन, मोजार्ट थेंज्याःपिं पाश्चत्य संगीतकारय् शास्त्रीय संगीत न्यनेगु बानी दयेका बिउगु खँ नं दीक्षितं कनादिल ।

अथे हे भाषाविद् बिष्णु चित्रकारं नेपाल लिपियात युनिकोडय् दुथ्याकेगु लागिं देवदासलिसे जानाः थः व समिर कर्माचार्यपिंसं यानागु पुलां खँ लुमंकादिल । ज्याझ्वलय् देवदासया जहाज सरोज मानन्धर, किजा नारायणदास मानन्धर व पासा मंगलकृष्ण मानन्धरपिंसं नं नुगःखँ तयादीगु खः ।