भक्तपुर सहकारीया नाटक च्वयेगु तालिम
ख्वप(नेपालभाषा टाइम्स)÷ भक्तपुर बचत तथा ऋण सहकारी संस्थाया नाटकया बाखं (स्क्रिप्ट) च्वयेगु व अभिनय कलाया तालिम क्वचाःगु दु । सहकारी संस्थाया सांस्कृतिक उपसमितिया ग्वसालय् नाट्यकर्मी समाज नेपालया प्राविधिक ग्वाहालिइ लछिया उगु तालिम जूगु खः ।
वंगु शनिवाः जूगु तालिम समापन ज्याझ्वलय् नेपाल मजदुर किसान पार्टी ख्वप जिल्ला समितिया नायःलिसें बागमति प्रदेशसभा सदस्य सुरेन्द्रराज गोसाइं अभिनयलिसें जीवन सार्थक यायेत निरन्तर रुपं अध्ययन याना वनाच्वनेमाःगु खँय् बः बियादिल । लिसें वय्कलं थज्याःगु विषयय् नियमित रुपं अन्तरक्र्रिया व गोष्ठि जुयाच्वन धाःसा उकिं अझ जीवन्तता बीत ग्वाहालि याइ धयादिल । राष्ट्रिय अन्तर्राष्ट्रिय ख्यलय् जुयाच्वंगु अन्याय, अत्याचार, दमन, भ्रष्टाचार, उत्पीडन, आदि विषययात कःघानाः दयेकातःगु नाटकं देय् व समाजयात चेतना थनेगु व समाजया सेवा यायेत ग्वाहालि याइगु विश्वास नं प्वंकादिल ।
संस्थाया नायः निर्मल प्रजापतिं थुकथंया तालिम सामाजिक उत्तरदायित्व अन्तर्गत जूगु चर्चा यानादिसें संस्था समाजलिसें थः सदस्यपिनिगु निंतिं सामाजिक, सांस्कृतिक, शैक्षिक, स्वास्थ्य, अतिरिक्र क्रियाकलाप थेंज्याःगु विविध क्षेत्रय् ज्या यायेगु व लगानी यानावयाच्वनागु जानकारी बियादिल ।
तालिमया संयोजक नारायणी खाइजुया सभापतित्वय् जूगु ज्याझ्वलय् मूपाहां गोसाइं तालिमय् सहभागि स्वीछम्ह प्रशिक्षार्थीतय्त दसिपौ नं लःल्हानादीगु खःसा उगु इलय् प्रशिक्षार्थीतय्सं ‘से नो टु ड्रग्स’, ‘नातावाद स्वाहा’ व ‘ड्रग्स एडिग्सन’ नाटक नं न्ह्यब्वःगु खः ।
LEAVE YOUR COMMENTS