प्रहरी चौकीइ नेवाःभाय् ल्हात धकाः सुमन सायमि हिरासतय्, कन्हय् माइतीघरय् प्रदर्शन

येँ – उपत्यका सतक विस्तार पीडित संघर्ष समितिया अध्यक्ष सुमन साय्मि लिसें बालाजुया सतक विस्तार पीडितपिंत ज्वनायंकातःगु विरुद्ध कन्हय् सुथय् १० बजे माइतीघरय् प्रदर्शन याइगु जूगु दु ।

बालाजुइ सतक विस्तार यायेगु धकाः थुनाः खाली यानातःगु जग्गाय् अनधिकृत कथं जस्तां घेरे याःगुलिं उगु जस्ता लिकयाः वांछ्वयाबिउबलय् ज्वना यंकूपिं न्याम्ह सतक विस्तार पीडिततय् त्वःतके धुंकाः बालाजु प्रहरी चौकीं वंम्ह अध्यक्ष सायमि लिसें मेपिं स्वम्हेसित प्रहरी चौकीइ नेवाः भाय् खँ ल्हात धकाः चौकीइ हे ज्वंगु खः ।

चौकी दुने नेवाः भाय् ल्हात धकाः तकं ज्वनाः राज्यसत्तां नेवाःतय्त तच्वकं दमन यानाच्वंगु धासें थुकिया विरुद्ध आः थःपिं अन्तिम लडाइलय् दुगु खँ समितिया उपाध्यक्ष विद्या श्रेष्ठं धयादीगु दु । गैरन्यायिक सतकविस्तार विरुद्ध थःपिं ल्वाना वयाच्वनागुलिइ यक्व नेवाःतय्सं समर्थन यानाच्वंसा सतकय् कुहां मवयाच्वंगुलिं थःपिनिगु आन्दोलन सफल जुइ मफयाच्वंगु धासें मय्जु श्रेष्ठं आः थःपिं अन्तिम लडाईलय् दुगुलिं कन्हय्या ज्याझ्वलय् माइतीघर मण्डलाय् वयाः थःपिंत हःपाः बियादीत इनाप यानादीगु दु ।

‘थज्याःगु गैरन्यायायिक ज्या जुयाच्वनं नं सतकय् कुहां वयाः समर्थन यानामबिउगुलिं जिमिगु आन्दोलनय् कमजोर जुयाच्वंगु दु । जिपिं थःपिं हे निराश जुइमाःगु अवस्थाय् दु, उकिं फयांफक्व यक्व सतकय् कुहां वयेत इनाप याना, गैरन्यायिक सतक विस्तार, नेवाःतय्त जुयाच्वंगु दमन विरुद्ध आः ला सतकय् कुहां वयेमाल’ वय्कलं धयादीगु दु ।

शहरी विकास राज्यमन्त्री रामवीर मानन्धरया पिएलिसें प्यम्ह न्याम्ह वयाः मंगलवाः अनधिकृत रुपं खाली जग्गाय् जस्तां घेरे याःवःगु धासें जग्गा थुवाःतय्सं बुधवाः सुथय् जस्ता लिकयाबिउगु खः । थथे जग्गा लिकया बिउबलय् जग्गाथुवाः न्याम्हेसित ज्वना यंकूगु खः । ज्वनायंकूपिं त्वःतकेगु निंतिं प्रहरी चौकी थ्यंम्ह संघर्ष समितिया नायः सायमि लगायत मेपिं स्वम्हेसित चौकीइ नेवाः भासं खँ ल्हात धकाः ज्वंगु खँ मय्जु श्रेष्ठं कनादीगु दु ।

सम्बन्धित बुखँ

LEAVE YOUR COMMENTS