मांया गुण लुमंका हालातःगु म्ये सार्वजनिक

येँ – थः मांयात समर्पण यानाः दयेकूगु नेपालभाषाया म्येया म्युजिक भिडियो थौं युट्युब मार्फत सार्वजनिक जूगु दु । म्ये हालामि सलिल सुन्दर तुलाधरं थः मां रुपशोभा तुलाधरयात समर्पण यानाः दयेकूगु म्ये ‘यः मां’या म्यूजिक भिडियो थौं हाइलाइट्स नेपालया युट्युब च्यानल पाखें सार्वजनिक जूगु खः ।

म्ये हालामि तुलाधरया मां मदुगु ४५ न्हुया पुण्यतिथि लाकाः संगीतबद्ध यायेगु व रेकर्ड याःगु थ्व म्येया म्युजिक भिडियो दछिया पुण्य तिथि लाकाः सार्वजनिक याःगु खः ।

मतिना प्रोडक्सनं तयार याःगु म्यूजिक भिडियोया निर्देशक नांजाःम्ह निर्देशक विजु कर्माचार्यं यानादीगु दुसा थुकी मन्जु श्रेष्ठ, दिपक मगर व सर्निका राजोपाध्यायं अभिनय यानातःगु दु । छायांकन अमर चित्रकारं याःगु खःसा सह निर्देशन व भिएफएक्स महेश्वर श्रेष्ठया दु ।

मांया गुण चित्रण यानाः संसारय् न्ह्याम्हेसित नं दक्कले माया याइम्ह देवी समानया मांया वियोग गुलि दुःखदायी जुइ धैगु भावना कःघानाः तयार यानातःगु थूगु दु । म्येया संगीत संयोजन अन्जन श्रेष्ठं याःगु दुसा रण बहादुर ताम्राकारं म्ये च्वज्याय् ग्वाहालि याःगु दु ।

थूगु म्येया हालामिलिसें संगीतकार व रचनाकार सलिल सुन्दर तुलाधरं नेपाल भाषा संगीतय् छपलाः एल्बम, मखं त्वाःया कायमचा नापं मेमेगु नं लोकंह्वाःगु म्ये हालादीधुंकूगु दु । अथेहे नेपाली संगीत लागाय् ड्याम ड्याम थें जाःगु लोकंह्वाःगु म्ये बियादीधुंकूगु दुसा नेपाली संकिपा निजर्लाय् भाले मोटर, चोखो मायामा तिमी नै हौ, थें जाःगु म्ये नं हालादीगु दु ।

म्ये स्वयादिसँ –