सत्यमोहन जोशीया १०४ क्वःगु जन्मजयन्ती

यल(नेपालभाषा टाइम्स)- वाङ्मय शताब्दी पुरुष सत्यमोहन जोशीया १०४ क्वःगु जन्मजयन्ती हंगु दु । लोक साहित्य परिषद्पाखें छवाःयंकं थीथी ज्याझ्वः यासें जन्मजयन्ती हनेगु झ्वलय् शनिवाः यल लाय्कुलिइ विशेष ज्याझ्वः याःगु खः ।

संघीय सरकारया उपप्रधानमन्त्रीलिसें गृहमन्त्री नारायणकाजी श्रेष्ठया प्रमुख आतिथ्यताय् उगु ज्याझ्वः जूगु खः । उपप्रधानलिसें गृहमन्त्री श्रेष्ठं मदुम्ह शताब्दी पुरुष जोशीया कृतित्व, व्यक्तित्व व वय्कलं बियादीगु योगदान देय्या निंतिं अमूल्य जूगु नापं न्हू पुस्ताया निंतिं वय्कः छम्ह पे्ररणादायी व्यक्तित्व जूगु चर्चा यानादिल ।

ज्याझ्वलय् मेपिं वक्तापिंसं मदुम्ह वाङ्मय शताब्दी पुरुष जोशीं भाषा, कला, साहित्य, संस्कृति आदि थीथी ख्यलय् बियादीगु योगदान व वय्कलं म्हितादीगु भूमिकायात कयाः चर्चा यानादीगु खः ।

ज्याझ्वलय् ३५ दँ स्वयां अप्वः ई शताब्दी पुरुष जोशी व वय्कःया जहान राधादेवी जोशीया सेवा यानादीम्ह ७९ दँ दुम्ह चिरिमै अवालेयात हनेज्या नं याःगु खः ।
स्वक्वःतक मदन पुरस्कार त्याकादीधुंकूम्ह शताब्दी पुरुष जोशी १०३ दँया उमेरय् वंगु असोज ३ गते मदुगु खः। वय्कलं नेपाःया लोक संस्कृति, लोक साहित्यलिसें लोक परम्पराया बारे आपालं सफू च्वयादीगु दु ।

परिषद्ं न्हापांखुसी शताब्दी पुरुष जोशीया जन्म जयन्ती हिदान, सफू ब्वज्या व पितब्वज्या, तारा दर्शन, सत्यमोहन जोशी संग्रहालय निःशुल्क अवलोकनलिसें थीथी ज्याझ्वः यानाः हंगु खः । थुकथं हे शनिवाःकुन्हु यल लाय्कू न्ह्यःने कात्ति दबुलिइ सत्यमोहन जोशीया झ्वाता तयाः दीपावली नं याःगु खः ।